Astanada Qoshqarbaev dańǵylynyń bir bóligi 15 qyrkúıekten bastap jabylady
ASTANA. KAZINFORM — Astanada Raqymjan Qoshqarbaev dańǵylynyń bir bóligi jóndeý jumysyna baılanysty jabylady. Bul týraly Astana qalasynyń ákimdigi málim etti.
— Astanada 15-20 qyrkúıek kúnderi Raqymjan Qoshqarbaev dańǵylynyń Shákárim Qudaıberdiuly dańǵyly men Abylaı han dańǵyly aralyǵynda salmaq ólsheıtin datchıkterdi ornatýǵa arnalǵan asfaltbeton jabynan tóseý jumysy júrgiziledi, — delingen elorda ákimdiginiń habarlamasynda.
Bul rette kólik qozǵalysy joldyń bir jaǵymen eki baǵytta uıymdastyrylady.
— Júrgizýshiler men jaıaý júrginshiler júrý baǵytyn aldyn ala josparlap, yqtımal ózgeristerdi eskerýi qajet. Qaýipsizdikti qamtamasyz etý jáne qolaısyzdyqtardy barynsha azaıtý maqsatynda tıisti jol belgileri men kórsetkishter ornatylady, — dep eskertti ákimdikten.
Eske sala keteıik, Astanada bıyl 50 kóshede jol jóndeý jumystary júrgiziledi.
