Astanada kóshelerdiń birine Shyńǵys Aıtmatov esimi beriledi

ASTANA. QazAqparat - Astana qalasynda kóshelerdiń birine tanymal jazýshy Shyńǵys Aıtmatovtyń esimi beriledi, dep habarlaıdy astinfo.kz.

Bul týraly «Qazaqstan halqy Assambleıasy: qurylýdyń tarıhı mańyzdylyǵy» atty dóńgelek ústel barysynda «Qyrǵyztan-Astana» qyrǵyz etnomádenı birlestiginiń jetekshisi Shavqat Ismaılov málim etti. «Astana qalasynda Shyńǵys Aıtmatov esimi kóshege beriledi. Bul másele Úkimette bekitildi, endigi Ádilet mınıstrliginiń tirkeýi qaldy. Kósheniń saltanatty ashylýyn ótkizbekpiz. Bul bizdiń Elbasymyzdyń qurmeti dep bilemin», - dedi Shavqat Ismaılov. Onyń sózinshe, Astana qalasynda 5-6 myńǵa jýyq, al jalpy Qazaqstan boıynsha 27 myń qyrǵyz halqynyń ókili turady. Shyńǵys Tórequluly Aıtmatov - «Jámılá», «Alǵashqy ustaz», «Qosh bol, Gúlsary», «Ǵasyrdan da uzaq tún», «Aq keme» sekildi tanymal týyndylardyń avtory. KSRO Memlekettik syılyǵynyń úsh márte ıegeri.