Astanada kóshedegi satýshylar biryńǵaı forma kıe bastady
ASTANA. QazAqparat - «Kóshe saýdasy 1000 oryn» baǵdarlamasy aıasynda elorda kásipkerleri biryńǵaı forma kııýge kóshti, dep habarlaıdy Astana ákimdigi medıa ortalyǵy .
1 shildede Esildiń jaǵasyndaǵy 15 jeke kásipkerge jańa formalary tabystaldy. Qalalyq Kásipkerlik jáne ónerkásip basqarmasy men «Saryarqa» ÁKK ókilderiniń aıtýynsha, jyl sońyna deıin qalada atalmysh baǵdarlama aıasynda jumys istep jatqan jeke kásipkerlerdiń barlyǵy biryńǵaı formaǵa kóshedi .
Joba jetekshileri biryńǵaı formanyń birneshe ereksheligin atap berdi. Ol birinshiden, ashyq sary jáne qara tústi. Sondaı-aq oǵan «Kóshe saýdasy - 1000 oryn» baǵdarlamasynyń logotıpi belgilengen. Oǵan qosa 100 paıyz otandyq ónim. Eń bastysy endi tutynýshylar atalǵan formaǵa qarap zań aıasynda jumys istep jatqan jeke kásipkerler men ruqsatsyz saýdagerlerdi ajyrata alatyn bolady.
«Biryńǵaı forma kásipkerlerdiń óz usynystarynyń jetistigi. Astanadaǵy kásipkerlik pen qyzmet sapasyn arttyrý maqsatynda qolǵa alynǵan bastama. Búgin Esil ózeniniń jaǵasynda jumys isteıtin kásipkerlerge jańa formalaryn tabystadyq. Aldaǵy ýaqytta kezeń-kezeńmen «Kóshe saýdasy 1000 oryn baǵdarlamasy» sheńberinde jumys isteıtin qalanyń barlyq kásipkerlerin jańa formaǵa kóshiremiz», - dedi joba jetekshisi Sáken Ádilbekov.
