Astanada kóshe sýretshisi Benksıge arnalǵan mýltımedııalyq kórme ashyldy
ASTANA. KAZINFORM — Lumiere Hall mýltımedııalyq mýzeıinde áıgili brıtandyq kóshe sýretshisi Benksı shyǵarmashylyǵyna arnalǵan kórme ashyldy. Kórmede sýretshiniń túpnusqa týyndylary, sırek jádigerleri jáne arnaıy ázirlengen mýltımedııalyq kórsetilim usynyldy.
Uıymdastyrýshylardyń aıtýynsha, joba Benksıdiń shyǵarmashylyq álemin jańa formatta tanystyrýdy kózdeıdi. Kelýshiler kórme barysynda sýretshiniń eń tanymal týyndylarymen tanysyp qana qoımaı, onyń shyǵarmashylyq atmosferasyn da sezine alady.
«Lumiere Hall» mýltımedııalyq mýzeıiniń quryltaıshysy Polına Egarmınniń aıtýynsha, mýzeı 10 jyldan beri jumys isteıdi. Qazir onyń Býdapesht pen Amsterdamda fılıaldary bar. Almatyda úsh jyl jumys istegen joba bıyl Astanada ashylǵan.
— Mundaı formattaǵy mýzeı úshin tóbesi bıik, keń ǵımarat qajet boldy. Sondyqtan uzaq ýaqyt boıy laıyqty oryn izdedik. Aqyry qala ortalyǵynan qolaıly oryn taýyp, 1 qańtarda ashyldyq. Osy ýaqyt ishinde Van Gog kórmesin ótkizdik. Tórt aıdyń ishinde mýzeıge 30 myń adam keldi, — dedi ol.
Onyń aıtýynsha, mýzeıdiń resmı ashylýyn uıymdastyrýshylar Benksı kórmesimen tuspa-tus ótkizýdi jón sanaǵan.
— Biz Benksıdiń túpnusqa jumystaryn alyp keldik. Bıyl onyń shynaıy tulǵasy anyqtaldy degen aqparat tarady. Alaıda sýretshiniń ókilderi bul málimetti resmı túrde rastaǵan joq, — dedi Polına Egarmın.
Kórme aıasynda kelýshiler sýretshiniń eń tanymal graffıtı týyndylaryn mýltımedııalyq kórsetilim arqyly tamashalaı alady. Sonymen qatar London, Brıstol jáne Nıý-Iork kósheleriniń atmosferasyn sezinip, Benksıdiń eń tanymal jobalarynyń biri — Dismaland keńistigimen tanysýǵa múmkindik bar.
Kórmede graffıtı salynǵan jol belgileri, banknottar men plakattar sekildi túpnusqa jádigerler de qoıylǵan.
— Kórmede usynylǵan eki jol belgisi kollektsııadaǵy eń sırek ári qundy jádigerlerdiń qataryna jatady. Sonymen qatar munda Benksıdiń «Dismaland»jobasynda qoldanylǵan banknottary men kıno plakattary da qoıylǵan. Kórmege kelgen ár adam sýretshiniń shyǵarmashylyǵyna óz baǵasyn bere alady. Ony búldirýshi dep qabyldaı ma, álde zamanaýı ónerdegi eń yqpaldy sýretshilerdiń biri retinde kóre me — bul árkimniń óz tańdaýy, — dedi Polına Egarmın.
Onyń aıtýynsha, Benksıdiń shyǵarmalarynda soǵys, saıasat, tutynýshylyq mádenıet jáne buqaralyq aqparat quraldarynyń yqpaly jıi kórinis tabady.
Máselen, kórmedegi erekshe jádigerlerdiń biri — hanshaıym Dıananyń beınesi salynǵan jalǵan fýnt kýpıýralary. Benksı 2004 jyly Dıananyń sýreti beınelengen aqshalardy shyǵaryp, halyq arasyna taratqan.
— Keıbir adamdar bul aqshamen tólem jasap úlgergen. Keıin sýretshini jalǵan aqsha jasady dep aıyptady. Onyń áli kúnge deıin jasyryn júrýiniń bir sebebi de osy, — dedi Polına Egarmın.
Sondaı-aq kórmede sýretshiniń soǵysqa qarsy taqyryptaǵy jumystary da qoıylǵan. Solardyń birinde áskerı qyzmetkerlerdiń júzine kúlki belgisi beınelengen.
— Osy arqyly Benksı áskerı formadaǵy adamdardyń da qarapaıym adam ekenin kórsetkisi kelgen, — dedi ol.
Polına Egarmınniń aıtýynsha, mýzeıdiń basty maqsaty — jastardyń ónerge qyzyǵýshylyǵyn arttyrý.
— Qazir jastardy dástúrli mýzeılerge tartý ońaı emes. Sondyqtan biz mýltımedııalyq tásil arqyly olardyń ónerge qyzyǵýshylyǵyn oıatqymyz keledi. Eger kórmeden keıin adamdar dástúrli mýzeılerge baryp, túpnusqa týyndylardy kórgisi kelse, bul — biz úshin úlken nátıje, — dedi ol.
Onyń aıtýynsha, aldaǵy ýaqytta mýzeıde Frıda Kalo, Aıvazovskıı, Rerıh jáne Mark Shagalǵa arnalǵan kórmeler uıymdastyrý josparlanyp otyr.
Eske sala keteıik, buǵan deıin elordada Qazaqstan halqynyń mádenıetine arnalǵan kórme uıymdastyrylǵanyn jazǵanbyz.
