Astanada kóshe sporty boıynsha Qazaqstan chempıonaty ótti

Street Workout - buqaralyq sport túrleriniń biri. Ol sport alańdaryndaǵy beltemirler, qyrly bórene, kóldeneń jáne tike satylar syndy sporttyq snarıadtarda túrli jattyǵýlardy qamtıdy.

Elimizde alǵash ret ótken birinshilikke barlyq aımaqtardan barlyǵy 38 adam qatysty. Olar alty jattyǵý boıynsha jarysty. Onyń eń basty bóligi - jeke frıstaıl. Bul jattyǵýda jas jigitter men qyzdar osy sport túri boıynsha kúshtik ádisterdi kórsetip qana qoımaı, óz jattyǵýynda erekshe shoý jasaýy tıis bolatyn.

Chempıonat qatysýshylardyń biri - Jalǵas Tókenovtiń jasy nebári 16 jasta. Ol Aqmola oblysy Atbasar aýdanynyń №7 mektebinde 11-synypta oqıdy. Jalǵas bala kezinde avtobýs astyna túsip qalyp, bir aıaǵynan aıyrylǵan. Buǵan qaramastan, ol street workout sportyna bir jyl buryn shyńdap kirise bastaıdy. Bir jyldyń ishinde Jalǵas osy sportpen úsh jyl aınalysyp júrgen aıaq-qoly saý sportshylardyń nátıjelerin kórsete bastady.

«Men Street Workout-pen bir jyl buryn, ózimniń aýlamda aınalysa bastadym. Ózim jeke aınalystym, beınerolıkterge qarap, úırenýge tyrystym. Men óz-ózimniń jigerimdi janı aldym dep esepteımin. Belgili bir jetistikterge jetý úshin eki aı ketti. Al bir jyldan keıin chempıonatqa qatysýǵa bolatyndaı joǵary deńgeıge kóterildim. Negizi buǵan ózgeleri 3 jyl ýaqytyn sarp etedi», - dedi ol «QazAqparat» tilshisimen bolǵan suhbatynda.

Buryndary Jalǵas sportzalǵa ara-tura bas suǵyp turatyn. Biraq, onyń aıtýynsha, street workout onyń sportqa degen qyzyǵýshylyǵyn oıatty. Qazaqstan chempıonaty onyń alǵashqy jarysy emes.

«Múmkin emes» degen sózdi unatpaımyn. Meniń óimirimde maǵan: «seniń qolyńnan kelmeıdi nemese jasaı almaısyn» degen sózderdi kóp aıtty. Alǵashynda jattyǵýlar jasaý barysynda men beınerolıkterdi jıi-jıi qarap júrdim. Men bir jattyǵýdy tańdap, ony bir aıdyń ishinde meńgerip shyǵamyn dep óz-ózime sert beretinmin. Meniń kóptegen aıaq-qoly saý dostarym sportpen shuǵyldanýǵa erinedi, bilem. Ózińdi-óziń jeńýiń kerek. Bul dúnıede eń qıyny - óz-ózińmen kúres, óz kemshilikterińdi jáne ádetterińdi eńserý. Seniń syrtqy álpetińniń qandaı ekeni mańyzdy emes. Saǵan ómir beretin eń basty qaınaryń - seniń rýhyń», - dep esepteıdi Jalǵas.

«Durys ómir súrý kerek. Óz ǵumyryńdaǵy árbir sekýndta parasattylyq bolsyn. Aqyl-oıdy, rýh pen deneni árqashan damytyp otyrý qajet. Sportpen shuǵyldanyńdar, temeki shekpeńder, spırttik ishimdikterdi ishpeńder. Sizder kóp uzamaı baqytty da, jarqyn jańa ómirdiń bastalǵanyn kóresizder», - dep atap ótti ol.

Alǵashqy respýblıkalyq chempıonatqa Reseı, Sheshenstan, Ýkraına elderinen kelgen halyqaralyq deńgeıdegi sportshylar tórelikke qatysty. Jarysta birinshi oryndy astanalyq Ileh Badýrgov jeńip aldy. Ekinshi orynǵa shymkenttik sportshy Rasýl ıAdarov jaıǵassa, qola júldeni Dmıtrıı Podebıda (Shymkent) qanjyǵasyna baılady. Endi olar Qazaqstan namysyn 2014 jyly Astanada ótetin Álem chempıonatynda qorǵamaq.