Astanada kóshe saýdagerlerine biryńǵaı kıim úlgisi engiziledi
ASTANA. QazAqparat - Bastapqy boljam boıynsha, elorda kúni qarsańynda, ıaǵnı, 1 shildede Nurjol saıajoly men Esil ózeniniń jaǵalaýyndaǵy satýshylarǵa arnalǵan biryńǵaı kıim úlgisin engizý josparlanýda, dep habarlaıdy qala ákimdiginiń saıty .
Bul jaıynda kásipkerlik jáne ónerkásip basqarmasy men «Astana» áleýmettik-kásipkerlik korporatsııasynyń birlesken bastamasymen ótken Esil aýdandyq ákim apparatynyń jınalysynda málim boldy. «Kóshe saýdalarynyń 1 000 orny» baǵdarlamasynyń aıasynda qyzmetin júrgizip otyrǵan kásipkerlerge arnalǵan biryńǵaı kıim úlgisi máselesin shaǵyn jáne orta kásip ıeleri de talqylady.
Shaǵyn jáne orta kásip ıeleri usynylǵan úlginiń qolaılyǵyn esepke ala otyryp biryńǵaı úlgidegi kıimge úlken qyzyǵýshylyq tanytty. Sonymen qatar ІІD jergilikti polıtsııa qyzmeti mamandarynyń kóshedegi beıbereket saýda máseleleri boıynsha jedel-aldyn alý sharalary kezinde atalǵan sanattaǵy kásipkerlerge quqyq qorǵaý organdary tarapynan narazylyq bolmaıdy.
Kásipkerlik salany damytýǵa arnalǵan memlekettik baǵdarlama aıasynda qoldaý tapqan iri tigin fabrıkalary birneshe úlgidegi kıim túrlerin usyndy.
Kásipkerlerdiń jalpy daýys berýleri arqyly nysandarda kıip júretin kıimniń ortaq úlgisi tańdap alyndy.
Bul iri kásiporyndar men shaǵyn jáne orta bıznes sýbektileri arasyndaǵy ózara yntymaqtastyqtyń kórinisi, dep sanaıdy Astana q. kásipkerlik jáne ónerkásip basqarmasynyń mamandary.
Vedomstvanyń mamandary Nurjol saıajolyndaǵy satýshylarǵa arnalǵan biryńǵaı úlgidegi kıimderdiń alǵashqy kezeńinen keıin basqa da kóshe saýdalarynyń ókilderi arasynda da keń qoldanysqa engiziletinine senimdi.
