Astanada kóshe ataýlarynyń durys jazylýy tekserildi
ASTANA. 13 aqpan. QazAqparat - Astana qalasynyń Tilderdi damytý basqarmasy 15 qańtar men 6 aqpan aralyǵynda Qazaqstan Respýblıkasyndaǵy «Til týraly» QR Zańy talaptarynyń oryndalýyn tekserý maqsatynda 14 reıd júrgizdi. Nátıjesinde 400-den astam kóshe tekserilip, kóptegen kóshe ataýlarynyń jazylýynda, rettik sandarynda ketken qateler anyqtaldy, dep habarlady basqarmanyń onomastıka bóliminiń bas mamany Naǵıma Maılybaeva elordanyń resmı saıtyna.
«Onomastıka týraly qabyldanǵan jańa zań - jer-sý jáne eldi meken ataýlary men kóshelerdiń, ózge de mańyzdy nysandardyń tarıhı nemese halyq qalaǵan esimderin qalpyna keltirýge birden-bir múmkindik beredi. Alaıda, halyq bir kósheniń ataýyn birneshe nusqada aıtady. Onyń ústine, kóshe ataýynyń jazylýynda kezdesetin stılıstıkalyq, ári orfografııalyq qatelikter de joq emes. Negizi, qaladaǵy kóshe ataýlarynyń durys jazylýyn qalalyq máslıhattyń sheshimimen ákimdik bir nusqada bekitedi. Jáne sol bastapqy nusqadan burmalanbaýy kerek», - dedi bas maman.
Reıd barysynda «dańǵyly Jeńis (durysy - Jeńis dańǵyly), Besshalkar kóshesi (durysy - Besshalqar kóshesi), Balhash oramy (durysy - Balqash oramy), Naıza-kara kóshesi (durysy - Naızaqara kóshesi)» dep jazylyp ketken qatelikterdi túzetýge tıisti organdarǵa usynys jasaldy.
Tilderdi damytý basqarmasy búginde naýryz aıynda ótetin qalalyq Onomastıka komıssııasynyń kezekti otyrysyn ótkizýge daıyndyq jumystaryn júrgizýde.
