Astanada «Kóshbasshy joly» kınoepopeıasy tegin kórsetiledi
ASTANA. QazAqparat - «25 juldyzdy kún», «Uly dala eli - táýelsizdiktiń 25 negizi» keń aýqymdy aktsııasy sheńberinde Qazaqstan Respýblıkasynyń Tuńǵysh Prezıdenti kúnin merekeleýge oraı 1 jeltoqsanda elorda turǵyndary men qonaqtary úshin «Kóshbasshy joly» kınoepopeıasy tegin kórsetiledi. Kórsetilimdi Astana qalasynyń ishki saıasat basqarmasy elordalyq «Kinopark» jáne «Arman 3D» kınoteatrlary jelisiniń qoldaýymen uıymdastyrady, dep jazady astana.gov.kz.
Kınokórsetilim tańǵy saǵat 10-da bastalyp, kúni boıy jalǵasady. Bul kúni elorda turǵyndary men qonaqtaryna «Mega Tsentr Astana», «Kerýen» jáne «Azııa park» saýda ortalyqtarynda ornalasqan Astananyń iri kınoteatrlary qyzmet kórsetedi. Kórermender seanstyń ýaqytyn jáne kóretin zaldy ózderi tańdaı alady.
Orys tilindegi kórsetilimder «Mega Tsentr Astana» saýda ortalyǵynda № 3 zalda (seans saǵat 10:00-de bastalady) jáne № 4 zalda (seans 10:40-ta bastalady) uıymdastyrylady.
Qazaq tilindegi kórsetilimder «Kerýen» saýda ortalyǵynda, № 1 zalda (seanstyń bastalýy 11:00-de jáne 14:10-da).
«Azııa park» saýda ortalyǵynda kınoepopeıanyń eki tildegi kórsetilimderi uıymdastyryldy: № 2 zalda kórermender orys tilinde (10:00-de), № 5 zalda qazaq tilinde ( 12:00-de) kóre alady.
