Astanada kóshi-qon shemasyn uıymdastyryp, 900 mln teńge paıda tapqan alaıaq sottaldy
ASTANA. KAZINFORM – Astananyń qylmystyq ister jónindegi aýdanaralyq soty vıza men mıgratsııalyq qyzmet kórsetý syltaýymen azamattardy aldaǵan áıelge úkim shyǵardy.
Sot málimetinshe, aıyptalýshy 124 epızod boıynsha asa iri kólemdegi alaıaqtyq jasady dep tanylǵan.
– Tergeý barysynda S. esimdi áıeldiń ózine jáne anasynyń atyna tirkelgen «A.» jáne «P.» JShS-leri arqyly zańgerlik qyzmet kórsetetindeı kórinis berip, uzaq merzimdi vızalar men mıgratsııalyq qyzmetter rásimdeýge kómektesemin degen jalǵan aqparat taratqany anyqtaldy. Ol AQSh, Ulybrıtanııa jáne Shengen aımaǵy elderine vıza, sondaı-aq yqtııarhat pen azamattyq rásimdeýge ýáde bergen, – delingen sot habarlamasynda.
Zardap shekkenderge keltirilgen jalpy shyǵyn kólemi 896 008 755 teńgeni quraǵan.
Prokýror aıyptalýshyny Qylmystyq kodekstiń 190-baby 4-bóligi 2-tarmaǵy boıynsha bas bostandyǵynan aıyrýdy jáne týrızm men mıgratsııa salasynda kásipkerlikpen aınalysýǵa bes jylǵa tyıym salýdy suraǵan.
Aıyptalýshy kinásin ishinara moıyndaǵan. Qorǵaýshy tarap eń tómengi jaza taǵaıyndaýdy surady.
Sot onyń kinási jábirlenýshilerdiń aıǵaqtarymen, aqsha aýdarymdary týraly túbirtektermen, zańgerlik qyzmet kórsetý jáne qaryz sharttarymen, kassalyq orderlermen, qolhattarmen jáne messendjerlerdegi hat almasýlarmen dáleldengenin málimdedi.
– Qylmystyq kodekstiń atalǵan baby boıynsha úsh eseden bes esege deıin aıyppul nemese múlkin tárkileı otyryp, 5 jyldan 10 jylǵa deıin bas bostandyǵynan aıyrý jazasy qarastyrylǵan, – dep atap ótti sottan.
Jeńildetetin mán-jaılardy jáne aýyrlatatyn jaǵdaılardyń joqtyǵyn eskergen sot áıeldi ortasha qaýipsizdik mekemesinde 6 jyl 8 aı merzimge bas bostandyǵynan aıyrdy.
Sonymen qatar oǵan bes jyl boıy týrızm jáne mıgratsııa salasynda kásipkerlik qyzmetpen aınalysýǵa tyıym salyndy.
Aıta keteıik, buǵan deıin Pavlodarda jalǵan kottedjdi jalǵa berip kelgen alaıaq sottalǵany habarlanǵan bolatyn.
