Astanada qosalqy stantsııada bolǵan apattan keıin jaryq berý qalpyna keltirildi
ASTANA. QazAqparat - Keshe saǵat 22.30-da elordadaǵy Sátbaev kóshesi men B. Momyshuly dańǵylynyń qıylysy aýdanynda PNF qosalqy stantsııasynyń kabeli órtendi. Apat saldarynan Aq bulaq 1, 2, 3 sh/a, B. Momyshuly dańǵyly, 4, 5, shaǵyn aýdandar, «Evrazııa» SO aýdany jaryqsyz qaldy.
Apat saldaryn joıý jumystarymen «AREK» AQ mamandary aınalysyp, jaryq berý qalpyna keltirildi. Bul týraly qala ákimdiginiń baspasóz hatshysy Elvıra Júrgenbaeva Feısbýktaǵy paraqshasynda habarlady.
«Qaıyrly kún! Keshe túnde birneshe aýdandarda jaryq óship, turǵyndarymyz yńǵaısyzdyqqa tap boldy. Jaryqqa jaýapty mamandar túnimen qyzmet etip, qazir barlyq úıge qýat kózin jetkizdi. Áriptesterime alǵys aıtyp, astanalyqtardan ýaqytsha yńǵaısyzdyqtar úshin keshirim suraımyz!» - dep jazdy ol.
Eske sala keteıik, keshe elorda ákimi Áset Isekeshev oqıǵa ornynda bolyp onyń sebebin anyqtaý jáne qalanyń barlyq elektr qýatymen jabdyqtaý nysandarynda osyndaı jaǵdaıdyń oryn alýyn boldyrmaý úshin tıisti sharalar qabyldaýdy tapsyrǵan bolatyn.
