Astanada qosalqy elektr stantsııalary men jylýmen jabdyqtaý nysandary salynyp jatyr

ASTANA. KAZINFORM – Astana qalasynyń ákimi Jeńis Qasymbek Instagram paraqshasynda salynyp jatqan nysandar týraly jazdy, dep habarlaıdy elorda ákimdiginiń resmı saıty.

Elordada qosymsha tirshilikti qamtamasyz etý nysandarynyń jumysy boıynsha júıeli jumys júrgizemiz. Olar qalaǵa jylý, sý, elektr energııasyn jáne t.b. beredi. Іske qosylǵan nysandar – «Turan» jáne «Ońtústik-Shyǵys» gaz jylytý stantsııalarynyń, JEO-3-tiń birinshi kezegi arqasynda qalada jylytý maýsymy shtattyq rejımde ótip jatyr. Bul tirshilikti qamtamasyz etý nysandary qalaǵa 1100 Gkal/saǵ astam qýat berdi, – dep jazdy elorda ákimi.

Derekke qaraǵanda, qalany qosymsha jylýmen qamtamasyz etý úshin aldaǵy jyldary «Telman» jańa gaz jylý stantsııasy salynyp jatyr. Qazirgi ýaqytta irgetasy men qadalardyń bitelýi boıynsha qurylys-montaj jumysy júrgizilýde. Bul joba elordada taǵy 80 myń turǵyndy turaqty jylýmen qamtamasyz etýge múmkindik beredi. «Telman» GJS qurylysy 2026 jyly aıaqtalady.

- Sol sııaqty bıyl qurylysy uzaqqa sozylǵan JEO-3-ti aıaqtaýdy josparlap otyrmyz. Bul nysannyń birinshi kezeńi 2023 jyldyń kúzinde aıaqtalyp, paıdalanýǵa berilgen.

Sondaı-aq, elektr jelileri boıynsha júıeli jumys júrgizemiz. Biz birqatar qosalqy elektr stantsııasynyń qurylysyn júrgizip jatyrmyz. Mysaly, «Araı» qosalqy stantsııasy 96%-ǵa daıyn.

Bul joba Astanany qýattylyǵy 80 MVA bolatyn úzdiksiz sapaly elektrmen qamtamasyz etedi. Biz ony osy jyldyń birinshi jartyjyldyǵynda aıaqtaımyz, - delingen aqparatta.

Sonymen qatar, «Qazybek» qosalqy stantsııasynyń qurylysy júrgip jatyr. Bul joba Temirjolshylar eldi mekenin qýaty 80 MVA bolatyn senimdi ári toqtaýsyz elektrmen qamtamasyz etedi.

Nysandy 2026 jyly aıaqtaý josparlanyp otyr.

Qalada ómir súrý sapasy eń aldymen tirshilikti qamtamasyz etý nysandarynyń jumysyna baılanysty.

Aıta keteıik, Astana–Teplotranzıt turǵyndardyń jylý aqysynyń qymbattyǵyna qatysty shaǵymyna túsinik berdi.