Astanada kórý júıesi nashar balalarǵa arnalǵan kabınet ashyldy
ASTANA. QazAqparat - Astana qalasy ákimdiginiń «№ 2 psıhologııalyq-pedagogıkalyq túzeý kabıneti» kommýnaldyq memlekettik mekemesi psıhologııalyq-pedagogıkalyq túzetý jáne ońaltý keshendi isterin júzege asyrý úshin Astana qalasy ákimdiginiń 2014 jylǵy 11 shildesindegi №107-1140 qaýlysymen qurylǵan. Sonyń negizinde Astana qalasy ákimdigi jáne «Dara» qorynyń qoldaýymen Astanadaǵy №71 mektepte kórý múmkindigi shekteýli balalarǵa arnalǵan psıhologııalyq-pedagogıkalyq túzetý kabıneti ashyldy. Bul týraly ákimdiktiń baspasóz qyzmetinen habarlady.
Damýy shekteýli búldirshinder úshin arnaıy jabdyqtalǵan kabınettiń naqty maqsaty aıqyn. Bundaı kózi kórmeıtin balalardyń sany Astana boıynsha 20-dan asyp otyr. Sonymen birge 90-ǵa jýyq kóz aqaýy bar bala memlekettik tirkeýde tur. Al ústimizdegi jylda 375 oryndyq tárbıeleý-beıimdeý ortalyǵy salynbaq. Sonyń bir qanaty arnaıy kórý júıesi nashar balalarǵa arnalady dep kózdelýde.
Ázirge ortalyqta 40-tan astam búldirshin tárbıelenýde. Úsh aıǵa sozylatyn jattyqtyrý jumystarynan soń, qabiletin tekserý testileýinen ótken tárbıelenýshilerdi shyǵaryp, ornyna kezekte turǵan balalardy qabyldaımyz degen kabınet meńgerýshisi Aıgerim Almoldaeva osynda atqarylatyn jumys jaıly tolyqtaı tústi.
Jańadan ashylǵan ortalyqtyń aıaǵynan nyq turyp ketýi úshin de alda atqarylar is az emes. Solardyń biri - kabınetti zaǵıp jandarǵa arnalǵan kompıýterlik quraldarmen, arnaıy prınterler men baǵdarlamalarmen qamtamasyz etý. Bul aldaǵy kúnderde sheshimin tabar túıin.
«Ulym deıtin ult bolmasa, ultym deıtin ul qaıdan bolsyn» degendeı, elimizdiń erteńi bolar, búgingi búldirshinderge qamqor bolý búgingi kúnniń basty talaby. Astana qalasynyń ákimdigi bul údeden árqashan shyǵa bilýde.
