Astanada kórý qabileti buzylǵan 300-ge jýyq adam ınvataksı qyzmetin paıdalanýda
ASTANA. QazAqparat - Dúnıejúzilik densaýlyq saqtaý uıymynyń sheshimimen 13 qarasha Halyqaralyq zaǵıptar kúni dep jarııalandy. Dál osy kúni Parıjde jáne Peterborda zaǵıptarǵa arnap mektepter men kásiporyndar ashqan frantsýz pedagogy Valentın Gaıýı dúnıege kelgen.
Qazirgi tańda Astanada múmkindigi shekteýli 12 585 adam tirkelgen, olardyń arasynda kórý organdarynyń qyzmeti buzylǵan adamdar da bar. Ondaı azamattardyń bir bóligi «Qazaq zaǵıptar qoǵamy» QB astanalyq fılıalynan kómek suraıdy. Qazir qoǵamdaǵylardyń qamqorlyǵynda 450 adam bar, olardyń 65 paıyzynan astamy egde jastaǵylar bolyp tabylady.
Astanada múmkindikteri shekteýli adamdarǵa arnap qalada qolaıly orta qurý boıynsha keshendi jumystar júrgizilýde. Kóshelerdiń qıylystary men kóshelerde dybystyq sıngaldary bar baǵdarshamdar qoldanylady, olar kózderi nashar kóretin adamdardyń joldan ótýine kómektesedi.
Joldan ótý qolaıly bolýy úshin kórý qabileti boıynsha І toptaǵy 294 múgedek jan ınvataksı qyzmetin paıdalanady. Budan bólek, Astanada byltyrǵy jyldan bastap № 23 balabaqsha negizinde nashar kóretin jáne múldem kórmeıtin zaǵıp balalar úshin arnaıy top jumys jasaıdy. Qazir topta alty bala bar, olarmen bilikti tárbıeshiler, defektologtar, logopedter jáne tıflogopedagogter jumys jasaıdy.
Kórý qabiletterin buzylǵan azamattardy múmkindiginshe kóbirek jumysqa tartý úshin bilim berýge kóp kóńil bólinedi. Astanada medıtsınalyq kolledjde bıke isin oqytý boıynsha pılottyq joba iske qosyldy, oǵan kórý qabileti boıynsha 16 múgedek jan tústi.
Kórý qabiletteri buzylǵan adamdar «Qazaqstan zaǵıptar qoǵamy» QB astanalyq fılıalyna 44-95-26 telefony boıynsha habarlasa alatynyn esterińizge salamyz, dep jazady elordanyń resmı saıty.
