Astanada korrektsııalyq mektep-ınternaty ashylady
ASTANA. QazAqparat - Astanada arnaıy korrektsııalyq mektep-ınternaty ashylady. Kóktal kentinde ornalasqan 375 oryndyq bilim oshaǵy qarasha aıynda paıdalanýǵa beriledi, dep habarlaıdy QazAqparat elorda ákimdiginiń medıa ortalyǵyna silteme jasap.
Osy kúni bas qalada 3 myńǵa jýyq bala ınklıýzıvtik bilim berýmen qamtylǵan. Qalalyq bilim basqarmasynyń jetekshisi Ánýar Janǵozınniń aıtýynsha, Astanada erekshe bilim berýdi qajet etetin 10 297 bala Psıho-medıko-pedagogıkalyq konsýltatsııada (PMPK) tirkeýde tur, onyń 2151 - 0-18 jas aralyǵyndaǵy múgedekter.
«2849 bala ınklıýzıvtik bilim berýmen qamtylǵan. Mektepke deıingi 13 mekeme men jalpy bilim beretin 51 mektepte somatıkalyq jáne aýytqýy bar naýqas balalar bilim alýda. Buǵan qosa, 230 bala jalpy bilim beretin mektep negizinde úıden oqytylyp jatyr», - dedi qalalyq máslıhattyń áleýmettik-mádenı damýy jónindegi turaqty komıssııanyń otyrysynda bilim basqarmasynyń jetekshisi Ánýar Janǵozın.
Onyń aıtýynsha, elordadaǵy 84 mekteptiń 75-inde nemese jalpy mektepterdiń 89% ınklıýzıvtik bilim alýǵa qajetti jaǵdaı jasalǵan. Pandýstar men qabyrǵaǵa qol súıenishteri jasaldy, dárethanalar qaıta jasaqtaldy, taktıldi joldar men 8 mektepte jedelsaty ornatyldy. Buǵan qosa úsh mektepke múmkindigi shekteýli balalardy ınvataksımen jetkizý jolǵa qoıylǵan.
