Astanada kórnekti pýblıtsıst S.Abdrahmanovtyń «Qashaǵan quryqtaǵan Qazaqstan» atty kitabynyń tanystyrylymy boldy
ASTANA. 19 qarasha. QazAqparat /Aıdar Ospanalıev/ - Búgin Astanadaǵy Prezıdenttik mádenıet ortalyǵynda kórnekti pýblıtsıst, fılologııa ǵylymynyń doktory,
«Egemen Qazaqstan» respýblıkalyq gazeti» aktsıonerlik qoǵamynyń prezıdenti Saýytbek Abdrahmanovtyń «Qashaǵan quryqtaǵan Qazaqstan» atty kitabynyń tanystyrylymy boldy.
Atalmysh sharaǵa Parlament Májilisiniń Tóraǵasy Oral Muhamedjanov, Senat Tóraǵasynyń orynbasary Muhambet Kópeev, QR Prezıdenti Ákimshiligi Іshki saıasat bóliminiń meńgerýshisi Darhan Myńbaı, Baılanys jáne aqparat mınıstri Asqar Jumaǵalıev pen birqatar Parlament depýtattary, aqyn-jazýshylar, ǵalymdar jáne qoǵam qaıratkerleri qatysty. Atalmysh shyǵarmanyń tusaýkeserine jınalǵan qaýym osy kitap pen onyń avtoryna qatysty ózderiniń oı-pikirlerimen bólisti.
«Qashaǵan quryqtaǵan Qazaqstan» atty jınaqqa álemniń 50-den astam memleketinde bolǵan kórnekti pýblıtsıst S.Abdrahmanovtyń 2001-2010 jyldar aralyǵynda shet elderde bolǵan kezderinde jasaǵan reportajdary men memleket basshylarymen, belgili qoǵam qaıratkerlerimen halyqaralyq saıasatqa qatysty suhbattary jınaqtalǵan. Sonymen qatar onda Eýropadaǵy qaýipsizdik jáne yntymaqtastyq uıymynyń tóraǵasy atanyp, halyqaralyq uıymnyń Sammıtin elimizde ótkizý jetistigine qol jetkizgen Qazaqstannyń halyqaralyq arenadaǵy orny aıshyqty etip kórsetilgen. Kitapta tek resmı saparlardyń jaı-japsarlary ǵana baıandalmaıdy. Avtor ózi bolǵan elderdegi taǵylymdy jaılar jóninde de syr shertip, táýelsizdigimiz týraly tuşymdy oılaryn ortaǵa salady.
Kitaptyń alǵy sózin Parlament Senatynyń Tóraǵasy Qasym-Jomart Toqaev jazǵan.
Osy rásimde sóılegen senator Qýanysh Sultanov: «Saýytbek kezinde basqarýshy partııanyń ortalyq komıtetinde, keıinnen Úkimet apparatynda, Prezıdent Ákimshiliginde, mınıstrlikte, Qazaq televızııasynda basqarýshy laýazymdy qyzmetter atqara júrip, qalamynan qol úzgen emes. Ol tipti qalamgershilik qasıetiniń órisin keńeıtip, zertteýshilik eńbekpen de aınalysyp keledi. Aýdarmashylyǵy men poezııaǵa sarapshylyǵy da bar. Saýytbek ónimdi de ósimdi qalamger», - degen jyly lebizin bildirdi.
