Astanada kórnekti memleket jáne qoǵam qaıratkeri Q. Turysovqa arnalǵan «Azamat» kitabynyń tanystyrylymy boldy
ANA. 2 aqpan. QazAqparat /Jasulan Amanbaıuly/ - Búgin elordada QR Prezıdenttik mádenıet ortalyǵynda kórnekti memleket jáne qoǵam qaıratkeri Qarataı Turysov jaıynda jazylǵan «Azamat» atty kitaptyń tusaýkeseri ótti.
Atalǵan eńbek Qarataı Turysovtyń týǵanyna 75 jyl tolýyna oraı shyǵarylǵan. Kitapty qurastyrǵan elimizge tanymal qalamger, «Egemen Qazaqstan» gazetiniń prezıdenti Saýytbek Abdrahmanovtyń aıtýynsha, bul shyǵarmada el úshin erekshe eńbek etken erdiń eren beınesi san qyrynan aıshyqty ashylǵan. Sondaı-aq Qarataı Turysov jaıly elimizge tanymal qaıratkerlerdiń, qalamgerlerdiń taǵylymdy oı-tolǵanystary, álemdik ekonomıkanyń kórnekti ókilderiniń bergen baǵalary, júrek tolqytarlyq estelikteri, onyń kózi tiri kezinde merzimdi baspasóz betterinde jarııalanǵan maqalalary men suhbattary jınaqtalǵan. Kitaptyń sońǵy bóliginde Q. Turysovqa arnalǵan jyr-óleńder toptastyrylyp otyr.
«Qarekeńniń kúndelikti tirshiliktegi adamdyq beınesi osy týyndyda alǵash ret ashylyp otyr dep aıtýǵa bolady. Óıtkeni munyń aldyndaǵy kitaptarda ol kisi kóbinese qaıratker, depýtat retinde qarastyrylatyn. Al munda qazaqtyń aıaýly azamaty, ázilqoı, darhan júrekti kisi retindegi beınesi ádemi shtrıhtarmen utymdy kórsetilgen»,-deıdi avtor.
Kitap úsh bólimnen turady: «Tulǵa», «Taǵylym», «Tilek». Іs-shara barysynda Q. Turysovtyń qaıratkerlik tulǵasy jaıly 10 mınýttyq qysqasha fılm kórsetildi. Tanystyrylym kezinde zaıyby Áskergúl Jambaıbekqyzy Turysova, Qazaqstannyń halyq jazýshysy, QR Memlekettik syılyǵynyń ıegeri, aqyn Farıza Onǵarsynova jáne taǵy basqalar óz estelikterimen bólisti.
«Úıde ol kisi abzal ata, baısaldy, adal jar boldy. Jumysy qaýyrt júretin Qarekeń, qoly qalt ete qalsa bar ýaqytyn balalarǵa bóletin. Shańyraq astynda jumys, qyzmet jaıynda áńgimeni qozǵamaıtyn. Alaıda ózi kóp daıyndyq jasaıtyn, qyzmetine óte jaýapty qaraıtyn. Balalarǵa da, bizge de jaýapkershilikti joǵary qoıýǵa úıretti. Ol óte qarapaıym, balalarǵa qamqor bola bildi, birge ómir súrgen jyldardy syılastyqpen ótkizdik»,-deıdi zaıyby Á. Turysova.
Qarataı Turysov 1934 jyly 2 aqpanda Jambyl oblysy, Jambyl aýdany, Jasórken aýylynda týǵan. Máskeý geologııalyq barlaý ınstıtýtyn bitirgen. Óz mamandyǵy boıynsha eńbek etken ol birqatar partııalyq jaýapty qyzmetterdi atqarǵan. Qarajal qalalyq, Torǵaı oblystyq partııa komıtetteriniń hatshysy boldy. Keıin birneshe laýazymdy qyzmetterde boldy. 1984-1986 jyldary Qazaqstan Kompartııasy Ortalyq Komıtetiniń hatshysy, 1986-1991 jyldar aralyǵynda Búkilodaqtyq Kásipodaqtar Ortalyq Komıtetiniń hatshysy, 1991 jyly Qazaq KSR Mınıstrler Keńesi Tóraǵasynyń orynbasary, QR Týrızm, dene shynyqtyrý jáne sport mınıstri, QR Ortalyq saılaý komıssııasynyń tóraǵasy qyzmetterin abyroımen atqardy. KSRO Joǵarǵy Keńesine eki dúrkin depýtat bolyp saılanǵan. Ómiriniń sońǵy jyldarynda Qazaqstan Respýblıkasy Parlamenti Májilisiniń Qarjy jáne bıýdjet komıtetiniń tóraǵasy bolǵan Qarataı Turysov zań shyǵarý isinde de óz qoltańbasyn qaldyrdy. Elge sińirgen eseli eńbegi úshin onnan astam medaldarmen, eki márte «Eńbek Qyzyl Tý» ordenimen jáne «Barys» ordenimen marapattalǵan.
Kitaptyń tusaýkeser rásiminde QR Prezıdenti Ákimshiliginiń ókilderi, depýtattyq korpýs, QR Joǵarǵy sotynyń, dıplomatııalyq korpýs pen konsýldyq mekemeler, mınıstrlik ókilderi, Astana qalasy ákimdigi men Bilim basqarmasy, QR Jazýshylar odaǵy, QR Jýrnalıster odaǵy, Mádenıet jáne qoǵam qaıratkerleri, «Nur Otan» HDP músheleri boldy.
