Astanada kórkemsóz oqý sheberleriniń Oralhan Bókeı atyndaǵy respýblıkalyq baıqaýy ótedi

Bul týraly QR Mádenıet mınıstrliginen habarlady.

Qazaqstan halqy tilderiniń HІІ-shi respýblıkalyq festıvali aıasynda ótetin baıqaýǵa oblystyq jáne qalalyq (Astana jáne Almaty) baıqaýlardyń jeńimpazdary qatysady.

Baıqaýdyń maqsaty - memlekettik tildiń qoldanylý aıasyn keńeıtý, til mádenıetin kóterý, kórkem ádebıetti nasıhattaýdy jandandyrý, el ishinen talapty, talantty jastardy izdep tabý.

Talapkerlerdiń ónerin baǵalap, sarapqa salatyn qazylar alqasynyń tóraǵasy - jazýshy, Memlekettik syılyqtyń laýreaty Tólen Ábdik. Qazylar alqasynyń quramynda sondaı-aq T.Júrgenov atyndaǵy Ulttyq óner akademııasynyń sahna tili kafedrasynyń meńgerýshisi, professor Darıǵa Turanqulova, «Habar» Agenttigi» AQ basqarma tóraǵasynyń orynbasary Aıdos Úkibaev, jazýshy Ánes Saraı, Astana jastar teatrynyń dırektory, Qazaqstan Respýblıkasynyń halyq ártisi Tilektes Meıramovtar bar.

Baıqaýǵa qatysýshylar O.Bókeı shyǵarmalarymen qatar, elimizge belgili, sóz ónerimizdiń damýyna ózindik úles qosqan dramatýrg, aqyn-jazýshylarymyzdyń shyǵarmalarynan úzindiler oqıtyn bolady.

Respýblıkalyq baıqaý jeńimpazdary QR MM Til komıtetiniń dıplomdarymen, gramotalarymen jáne baǵaly syılyqtarmen marapattalady.