Astanada kórkemsóz oqý sheberleriniń Oralhan Bókeı atyndaǵy HІІ-shi respýblıkalyq baıqaýy ótip jatyr

Baıqaýdy uıymdastyrýshy - QR Mádenıet mınıstrliginiń Til komıteti.

«Búgin biz dástúrli úlken báıgeni taǵy da bastaǵaly otyrmyz. Eń alǵash ret bul báıge Astanaǵa qazaq jurty jıi kele bastaǵan ýaqytta, Aqorda irgesin tigip jatqan kezde ashyldy. Ol nege O.Bókeıdiń atymen ataldy? Sebebi, Oralhan qazaq rýhanııatynyń eń úlken tulǵalarynyń biri boldy. Jasyndaı jarqyrap shyqty. Ádebıette, mádenıette keremet qubylys boldy. Ony ózderińiz jaqsy bilesizder. Oralhan 80-shi jyldardyń jastary úshin eń jaqsy, eń kóp oqylǵan jáne eń tanymal azamat boldy», - dedi baıqaýdy quttyqtaý sózimen ashqan Til komıtetiniń tóraǵasy Baýyrjan Omarov.

B.Omarovtyń aıtýynsha, ol jyldar qoǵamnyń O.Bókeıdiń shyǵarmalarymen tynystaǵan kezeńi boldy, jastar arasynda onyń týyndylaryn jatqa oqý sánge aınaldy. Jáne qansha jyldar ótip, zamannyń aǵymy ózgerse-daǵy olar búgingi kúnniń urpaǵynda ózderiniń rýhanı qundylyqtaryn joǵaltqan joq.

Baıqaýǵa elimizdiń barlyq oblystary men Astana jáne Almaty qalalarynan qalalyq, oblystyq deńgeılerdegi baıqaýlardyń barlyǵy 16 jeńimpazy qatysýda. Baıqaý úsh kezeńnen turady - prozalyq, dramalyq jáne poezııalyq shyǵarmalardan úzindiler oqý. Qatysýshylar sondaı-aq, elimizge belgili ózge de aqyn-jazýshylarymyzdyń kez-kelgen shyǵarmalarynan úzindiler oqıdy.

Memlekettik syılyqtyń laýreaty, jazýshy Tólen Ábdik tóraǵalyq etken qazylar alqasynyń quramynda T.Júrgenov atyndaǵy Ulttyq óner akademııasynyń sahna tili kafedrasynyń meńgerýshisi, professor Darıǵa Turanqulova, «Habar» Agenttiginiń redaktory Zeıin Álipbek, jazýshy Ánes Saraı, Astana jastar teatrynyń dırektory, Qazaqstan Respýblıkasynyń halyq ártisi Tilektes Meıramovtar bar.

Olar baıqaýǵa atysýshylardyń kórkem mátindi oqý sheberligin, oqylatyn shyǵarmany tańdaý talǵamyn, daýys mánerin, sahnada ózin-ózi ustaýy men sahnalyq kıimderin baǵalaıtyn bolady.

Baıqaý jeńimpazdary Til komıtetiniń dıplomdarymen, alǵys hattarymen jáne baǵaly syılyqtarmen marapattalady.