Astanada kórkem gımnastıkadan ALEM CUP halyqaralyq týrnırleriniń aýqymdy serııasy ótip jatyr
ASTANA. KAZINFORM — Qazaqstan jeńil atletıka kesheninde kórkem gımnastıkadan alǵash ret ALEM CUP halyqaralyq týrnırleriniń aýqymdy serııasy ótip jatyr, dep habarlaıdy elorda ákimdiginiń resmı saıty.
Jarystyń alǵashqy kúni «ASTANA CUP» jáne «ALEM BABY CUP» básekesimen ashyldy. Bul jerde 4 jastan bastap 15 jasqa deıingi sportshylar jas erekshelikteri boıynsha jeke jáne toptyq saıystarda júldeni sarapqa salady. Atalǵan týrnırge Qazaqstannyń óńirlerinen bólek, Reseı, Armenııa elderiniń gımnasshylary qatysyp jatyr.
Dodanyń taǵy bir erekshiligi — kórkem gımnasshylardy ádil baǵalaý maqsatynda Qyrǵyzstan, Ózbekstan jáne Ázerbaıjan elderinen tóreshiler shaqyryldy.
Aıta keteıik, 4 kúnge jalǵasatyn týrnırler serııasy myna tártippen ótedi:
- «FIG ALEM CUP» — 8, 9 jáne 10 naýryz kúni ótedi. Jarysqa Qazaqstan, Italııa, Kıpr, Sırııa, Kanada jáne Qyrǵyzstan elderinen 60-tan astam lıtsenzııalanǵan gımnast qatysady. «FIG ALEM CUP» — Halyqaralyq gımnastıka federatsııasynyń (FIG) resmı lıtsenzııasy bar sportshylar baq synaıtyn halyqaralyq deńgeıdegi týrnır.
- «ALEM CUP» respýblıkalyq týrnırine qatysýshylar 9 jáne 10 naýryz kúnderi baq synaıdy. Bul jarysqa Qazaqstan Respýblıkasynyń 200-den astam gımnasty, sport sheberleri baǵdarlama boıynsha qatysady.
- «ASTANA CUP» jáne «ALEM BABY CUP» halyqaralyq týrnırleri — 7 jáne 8 naýryzǵa uıymdastyrylǵan. Atalǵan jarystarǵa Izraıl, Reseı, Kanada, Portýgalııa, Armenııa jáne Qazaqstannan shamamen 800 gımnast qatysady. Týrnırler barlyq jas sanatyn qamtıdy — eń jas qatysýshylardan bastap joǵary razrıadtaǵy sportshylarǵa deıin, onyń ishinde alǵashqy jarysyna qatysatyn gımnastar da bar.
Eske salaıyq, ótken aıda Jetisý oblysynda óńirdegi alǵashqy kórkem gımnastıka zaly qoldanysqa berildi.
