Astanada Qorǵanys mınıstriniń orynbasary áskerı bólimderdi tekserdi
ASTANA. KAZINFORM – Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Asqar Mustabekov Qarýly kúshterdiń Arnaıy operatsııalar kúshterine qaraıtyn áskerı bólimderde boldy.
General-maıor Asqar Mustabekov áskerı bólim komandırleriniń ınfraqurylymdy odan ári damytý, materıaldyq-tehnıkalyq bazany jetildirý, jaýyngerlik jáne arnaıy daıarlyq nátıjeleri týraly baıandamalaryn tyńdady.
Arnaıy operatsııalar kúshteriniń nusqaýshylary oǵan áskerı qyzmetshiler qarý-jaraq pen áskerı tehnıkany meńgerý mashyqtaryn jetildiretin oqý-jattyǵý kesheniniń qalaı jabdyqtalǵanyn kórsetti.
Arnaıy operatsııalar kúshteriniń qolbasshylyǵy Qorǵanys mınıstriniń orynbasaryna Qarýly kúshterdi tsıfrlyq transformatsııalaý jáne jasandy ıntellekt tehnologııalaryn engizý baǵytyndaǵy jumystary jaıly málimdedi. Tsıfrlyq ofıtserler basqarý men áskerı qyzmetshilerdi daıarlaý úderisterin jetildirýge arnalǵan Centrum baǵdarlamasy men «Arnaıy operatsııalar kúshteri jaýyngeriniń jeke profıli» jobasyn tanystyrdy.
General-maıor Asqar Mustabekov áskerge jýyrda kelgen sarbazdarmen kezdesip, olardyń qyzmeti men turmys jaǵdaıyna, áskerı ortaǵa beıimdelý barysyna, moraldyq-psıhologııalyq kúıine jáne qoıylǵan mindetterdi oryndaýǵa daıyndyǵyna mán berdi.
Sapar sońynda Qorǵanys mınıstriniń orynbasary tárbıe jáne ıdeologııalyq jumysty barynsha jetildirý, áskerı tártipti nyǵaıtý jáne bólimderdegi qyzmet qaýipsizdigin qamtamasyz etý jóninde birqatar tapsyrmalar berdi.
Aıta ketelik Qorǵanys mınıstrligi áskerı qyzmetshilerdiń synyptyq biliktiligin aıqyndaý tártibin bekitken edi.
