Astanada Qorǵanys mınıstrliginiń áskerı gospıtali jańa jabdyqtarmen tolyqty
ASTANA. KAZINFORM – Qazaqstan Respýblıkasy Qorǵanys mınıstrligi Bas áskerı klınıkalyq gospıtaliniń alǵashqy medıtsınalyq-sanıtarlyq kómek kórsetý bólimshesinde materıaldyq-tehnıkalyq jańartý jumystary tolyq aıaqtaldy. Bul týraly Qorǵanys mınıstrliginiń baspasóz qyzmeti habarlady.
Fılıalda jóndeý júrgizilip, eksperttik sanattaǵy ýltradybystyq dıagnostıka apparaty, soqqy-tolqyndy jáne jaryq terapııasy qurylǵylary, kóz jáne LOR aýrýlaryn dıagnostıkalaýǵa arnalǵan quraldar, gormondyq kórsetkishter men onkomarkerlerdi anyqtaıtyn avtomattandyrylǵan analızatorlar paıdalanýǵa berildi.
– Endi bizdiń bólimshe zamanaýı standarttar men talaptarǵa saı áskerı qyzmetshilerge, olardyń otbasy múshelerine jáne Qarýly kúshterdiń ardagerlerine medıtsınalyq qyzmet kórsetetin kópsalaly ortalyq retinde jumys isteıdi, - dedi mekeme basshysy medıtsına qyzmetiniń maıory Zemfıra Mýslımova.
Bólimshede kúndizgi statsıonar, stomatologııalyq, dıagnostıkalyq, fızıoterapııalyq jáne ambýlatorııalyq-emhanalyq bólimder jumys isteıdi.
Kúndizgi statsıonardyń uıymdastyrylýyna baılanysty patsıentterge táýlik boıy aýrýhanada jatýdyń qajettiligi joıyldy.
Zamanaýı qural-jabdyqtarmen qamtylǵan stomatologııada terapııalyq jáne hırýrgııalyq em túrleri kórsetiledi. 2026 jyly ortopedııalyq qyzmet kórsetý josparlanǵan.
Ambýlatorııalyq-emhanalyq kómek bóliminde patsıentterdi joǵary bilikti dárigerler qabyldaıdy. Keshendi tekserý men naqty dıagnoz qoıý úshin qan men zár taldaýlary, ýltradybystyq jáne fýnktsıonaldyq zertteý ádisteri júrgiziledi. Sonymen qatar, munda profılaktıkalyq tekserýler men vaktsınatsııa, áskerı-dárigerlik saraptama jáne sanatorıı-kýrorttyq emdeýge irikteý júzege asyrylady.
Basshylyqtyń aıtýynsha, bólimsheniń jańǵyrtylýy medıtsınalyq kómektiń qoljetimdiligi men sapasyn arttyryp, Qarýly kúshterdiń jeke quramynyń densaýlyǵyn qorǵaý deńgeıin kúsheıtedi.
Eske sala keteıik, buǵan deıin Ulttyq ulan Shymkenttegi áskerı qyzmetshiniń ólimine qatysty túsinikteme bergenin jazǵanbyz.