Astanada Qorǵaljyn tasjolynyń bir bóligi 10 qyrkúıekke deıin ishinara jabylady
ASTANA. KAZINFORM — Astanada ortasha jóndeý jumystaryna baılanysty Qorǵaljyn tasjolynyń bir bóliginde 10 qyrkúıekke deıin kólik qozǵalysy ishinara shekteledi. Bul týraly Astana qalasynyń ákimdigi málim etti.
Astana qalasy ákimdiginiń qalalyq monıtorıng jáne jedel áreket etý ortalyǵynyń málimetinshe, Qorǵaljyn tasjolynda «Rýbej» beketinen №128 kóshege deıingi aralyqta ortasha jóndeý jumystary júrgiziledi.
Osyǵan baılanysty atalǵan ýchaskede 10 qyrkúıekke deıin kólik qozǵalysy ishinara jabylady. Kólik qozǵalysy joldyń bir bóligimen eki baǵytta da uıymdastyrylady.
Vedomstvo júrgizýshiler men jaıaý júrginshilerden marshrýttaryn aldyn ala josparlap, jol qozǵalysyndaǵy ýaqytsha ózgeristerdi eskerýdi surady. Qaýipsizdikti qamtamasyz etý jáne qolaısyzdyqtardy azaıtý úshin jol boıyna ýaqytsha jol belgileri men baǵyttaýshy kórsetkishter ornatylady.
— Ózgeristerge túsinistikpen qarap, qala ishinde júrip-turýdy josparlaǵan kezde osy shekteýlerdi aldyn ala eskerýlerińizdi suraımyz, — dep habarlady vedomstvo.
Buǵan deıin 19–22 tamyz aralyǵynda Astanadaǵy A. Kravtsov kóshesinde jol jabynynyń joǵarǵy qabatyn tóseý jumystaryna baılanysty kólik qozǵalysy ishinara shekteletini habarlanǵan bolatyn.
