Astanada Koreıanyń tanymal balet trýppasy óner kórsetedi
ASTANA. QazAqpart - Koreılik tanymal Universal Ballet trýppasy elordada 26 jáne 27 maýsym kúnderi óner kórsetedi. Trýppanyń gastroldik qoıylymy Eurasia Dance Festival Halyqaralyq balet óneri festıvali aıasynda ótedi, dep habarlaıdy Mádenıet jáne sport mınıstrliginiń baspasóz qyzmeti.
Ujym Nacho Dýato, Raımondo Rebek, Ohad Naharın syndy shoqtyǵy bıik qazirgi zamanǵy horeograftardyń avtorlyq baletterin usynady. «This is modern» keshiniń baǵdarlamasyna «Elf», «Aq tús», «Mınýs 7» atty tanymal qoıylymdar endi.
«Biz Qazaqstanda alǵash ret óner kórsetýdemiz. Qazirgi tańda trýppada shamamen 60 ártis jumys jasaıdy, al gastroldik saparǵa 35 keremet bıshi shyǵatyn bolady. «Astana Opera» kórermenderine arnalǵan gastroldik repertýarǵa qosylǵan baletterdi biz jyl saıyn Korean ballet festival (Seýl) festıvalinde kórsetip kelemiz. Bul shaǵyn spektaklderdi kórermender óte jaqsy kóredi ári asyǵa kútedi, sondyqtan biz sol qoıylymdardy sizderge de alyp kelip, kórsetýdi uıǵardyq. Álem boıynsha ónersúıer qaýym ókilderi ystyq yqylaspen qabyl alǵandaı, qazaqstandyq kórermen de óziniń oń baǵasyn berer dep úmittenemiz», - dep bólisti Universal Ballet dırektorynyń orynbasary Tıen Rıý.
Trýppa Japonııa, Kolýmbııa, Túrkııa, Qytaı, OAR, Reseı, Frantsııa, AQSh, Kanada, Oman jáne Sıngapýr qalalarynda óner kórsetip, óziniń úshjyldyq álemdik týrnesin támamdady.
