Astanada Koreıanyń tanymal balet trýppasy óner kórsetedi
ASTANA. QazAqparat - Koreılik tanymal Universal Ballet trýppasy «Astana Opera» sahnasynda 26 jáne 27 maýsym kúnderi óner kórsetedi. Teatrdyń baspasóz qyzmetiniń habarlaýynsha, trýppanyń gastroldik qoıylymy Eurasia Dance Festival Halyqaralyq balet óneri festıvali aıasynda ótedi.
Ujym Nacho Dýato, Raımondo Rebek, Ohad Naharın syndy shoqtyǵy bıik qazirgi zamanǵy horeograftardyń avtorlyq baletterin usynady. «This is modern» keshiniń baǵdarlamasyna «Elf», «Aq tús», «Mınýs 7» atty tanymal qoıylymdar endi.
«Biz Qazaqstanda alǵash ret óner kórsetýdemiz. Qazirgi tańda trýppada shamamen 60 ártis jumys jasaıdy, al gastroldik saparǵa 35 keremet bıshi shyǵatyn bolady. «Astana Opera» kórermenderine arnalǵan gastroldik repertýarǵa qosylǵan baletterdi biz jyl saıyn Korean ballet festival (Seýl) festıvalinde kórsetip kelemiz. Bul shaǵyn spektaklderdi kórermender qatty jaqsy kóredi ári asyǵa kútedi, sondyqtan biz sol qoıylymdardy sizderge de alyp kelip, kórsetýdi uıǵardyq. Álem boıynsha bizdiń balettiń jankúıerleri ystyq yqylaspen qabyl alǵandaı, qazaqstandyq kórermen de óziniń oń baǵasyn berer dep úmittenemiz», - dep bólisti Universal Ballet ártistik dırektorynyń orynbasary Tıen Rıý.
Trýppa Japonııa, Kolýmbııa, Túrkııa, Qytaı, OAR, Reseı, Frantsııa, AQSh, Kanada, Oman jáne Sıngapýr qalalarynda óner kórsetip, óziniń úshjyldyq álemdik týrnesin támamdady.
Universal Ballet ýaqyttyń synynan ótkenin eske sala keteıik - 1984 jyly onyń negizi qalanǵan edi. Trýppa quramynda Eýropa, Azııa men Amerıkanyń 12 elinen ókilderi bar. Universal Ballet bas dırektory Djýlııa Mýn, kórkemdik jetekshi Braıan ıÝ jáne Qurmetti kórkemdik jetekshi Oleg Vınogradov basshylyǵymen azııalyq kerbezdik pen úılesimdilikti batystyq klassıkalyq balettiń kúshi men ásemdigimen aralastyra otyryp, únemi tanymaldylyq pen qurmetke ıe bolyp keledi. Ujymnyń jetistikteri ishinde - «Ónerdegi kóshbasshylyq» prezıdenttik marapaty bar (1999).
Balet klassıkasy bolyp tabylatyn «Aqqý kóli», «Don Kıhot», «Jızel», «Baıaderka», sonymen qatar Djon Krankonyń «Onegın», Ýılıam Forsaıttyń «Altyn shıe pisken jer», Irjı Kılıannyń «Alty bı», «Kishkentaı ajal» t.b. qazirgi zamanǵy jaýharlarmen qatar trýppa repertýarynda koreı folklorynyń klassıkalyq baletpen úılesken ulttyq horeografııa týyndylary - «Shım Shon - Qıyr Shyǵys ańyzy» jáne «Chanhýang mahabbaty» bar.
