Astanada kópjyldyq gúlder alleıasy paıda boldy
ASTANA. QazAqparat - Alǵash kópjyldyq gúlder alleıasy elordanyń Saryarqa aýdanynda ashyldy, onda gúldiń 3500 túri otyrǵyzylǵan. Bul týraly Saryarqa aýdanynyń ákimi Arman Turlybek Feısbýktegi paraqshasyna jazdy, dep habarlaıdy QazAqparat tilshisi.
«Búgin jalpyqalalyq senbilik kezinde turǵyndarymyz pılottyq jobanyń kýágeri boldy. Atalǵan jobany biz qalalyq ortany regeneratsııalaý basqarmasymen birlesip uıymdastyryp, uly Abaı Qunanbaev eskertkishiniń janynda tutas gúlder alleıasyn otyrǵyzdyq. Irıs (qurtqashash), rıabınnık (sheten), shalfeı (sálben), gortenzııa (shyǵys gúli), ıtmuryn sekildi 3500 gúl bul jerge ózgeshe sıpat berip, hosh ıis syılaıdy», - dep jazdy Arman Turlybek.
Sonymen qatar aýdan ákimi jyl saıyn ártúrli gúlderdi otyrǵyzyp jaǵymdy atmosferany uzaǵyraq ustaýǵa tyrysatyndyqtaryn, degenmen kóp gúlder bir maýsymdyq bolǵandyqtan ádemilik uzaqqa sozylmaıtynyn da tilge tıek etti. Jáne kóptegen qalalardyń kópjyldyq ósimdikterdi ósirýge kóshkenin aıtyp ótti.
«Grabchevskı» dep atalatyn varshavalyq kóshetterden alyp otyrǵyzylǵan kópjyldyq gúlder alleıasy qala boıynsha alǵashqy bolyp sanalady.
«Atalǵan tamasha ósimdikter astanalyq «Rıtts Karlton» oteliniń aýmaǵynda bizdiń bir qysqa tótep berip shyqty. Bul rettegi bizdiń strategııa mynandaı - bir jyldyq gúlderden kezeń-kezeńimen bas tartyp, nátıjesinde qarajatty únemdeý. Al bizder, turǵyndar bolsa, birneshe jyl boıyna olardyń gúldep turatynyna qýanatyn bolamyz», - dedi aýdan ákimi.
