Astanada kópsalaly saýda-logıstıkalyq ortalyq boı kóteredi
ASTANA. QazAqparat - Astanada kópsalaly saýda-logıstıkalyq ortalyqtyń alǵashqy kirpishi qalandy. Jańa qurylys nysanynyń negizin qalaýǵa qala ákimi Imanǵalı Tasmaǵambetov te qatysty, dep habarlaıdy astana.kz .
Ortalyqta 80 myń sharshy metrlik 7 pavılonnan turatyn iri zamanaýı bazar, logıstıkalyq termınal bolady. 120 myń sharshy metr aýmaqty alatyn logıstıkalyq termınal kesheninde azyq-túlik ónimderin saqtaıtyn qurǵaq klımattyq qoıma boı kóteredi. Sondaı-aq, Astanada tuńǵysh ret jemis-jıdek pen kókónisti bir jylǵa deıin saqtaýǵa múmkindik berip, gazben retteletin qoıma da salynady.
«Qoıma men saýda ortalyqtary 85 gektar jerdi alyp jatyr. Joba qurylysy 2014 jyldyń sáýirinde bastalyp, 2017 jyldyń ekinshi toqsanynda aıaqtalady. Bıyl alǵashqy logıstıkalyq keshen men 2 saýda pavılony paıdalanýǵa beriledi», - deıdi qurylys kompanııasıanyń ókili Vıacheslav Zaporojets.
Keshenniń úshinshi bóliginde saýda-sattyq órbıdi. Avtomoll, kıim-keshek, turmystyq taýarlar men qurylys zattaryn da bir jerden tabasyz. Sondaı-aq boljam boıynsha 2017 jyly bul ortalyqqa kúnine 100 myń adam keledi.
«Aıta keterligi, mundaı iri keshen Madrıd pen Parıjde bar eken. Sheteldik kompanııalardyń ozyq úlgisin paıdalana otyryp salynatyn keshen 3 myńǵa jýyq adamdy jumyspen qamtymaq. Osylaısha sapasy tómen jabaıy bazarlardyń jabylýyna sep bolatyn keshen deldalsyz aýylsharýashylyq azyq-túlik óndirýshilerdiń kásibin dóńgeletýdi maqsat etedi» delingen habarlamada.
