Astanada kópqabatty úılerdiń aýlalaryn abattandyrý jalǵasýda

Bul maqsattaǵy Qala kúni merekesine deıin júzege asyrylǵan jumystar odan ári de jalǵasyn tabatyn bolady. Bul týraly Astana qalasy ákimi apparatynyń baspasóz qyzmetinen habarlady. Aıta keteıik, 2010-2013 jyldary Saryarqa aýdanyndaǵy 707 aýlanyń 430-y abattandyryldy. Sondaı-aq 80 aýlaǵa oıyn alańdary ornatyldy. Bıyl aýdanda 150 aýla abattandyrý jumystaryn qajet etedi. Qazirgi ýaqytta 50 aýla jobalansa, 28 aýlada qurylys-montajdaý jumystary qolǵa alyndy. Esil aýdanynda bıylǵy maýsymda 13 turǵyn úıdiń aýlasyn abattandyrý jumystary bastaldy: Saýran k-si 4, Syǵanaq k-si 18 «Kraýn Plaza» TK, Saýran k-si 3, Dostyq k-si 10 «Almaty» TK, Syǵanaq k-si 15 «Vızıt» TK, Turan dańǵyly 19/1 «Edem» TK, Qorǵaljyn tas joly 4, 4/1 «Kúlsaı» TK, Saraıshyq k-si 2, Juban ana k-si 1, 3, 5, Májnún tuıyq kóshesi 6. Aýlaishilik aýmaqtardy abattandyrý ázirlengen jobalar negizinde júzege asyrylýda. Máselen, Esil aýdanynda 500 sharshy metrlik balalar alańdary men gımnastıkalyq alańdarǵa rezeńke jabyn tóselse, 10 gımnastıkalyq trenajer men 8 shaǵyn arhıtektýralyq jobalar (átkenshek, «Órmekshi» oıyn kesheni, qum alańdary jáne t.b.) ornatylyp, sondaı-aq 550 sharshy metrlik sport alańy jasaldy. Qazirgi ýaqytta Almaty aýdanyndaǵy 20 aýlada qurylys-montajdaý jumystary qolǵa alyndy. Munda 13 oıyn kesheni, 18 qum alańy, 18 kir jaıatyn oryn, 6 sport alańy, 40 jaryqtandyrý tiregi, 194 oryndyq, 206 qoqys jáshigi, 11 kúrke ornatylady, 38 043,15 sharshy metr aýmaqqa asfalt, 1589,92 sharshy metr júrginshi jolyna tas tóseledi, dep jazady elorda ákimdiginiń resmı saıtynda.