Astanada kópqabatty úıden sekirmek bolǵan turǵyn qalaı qutqaryldy
ASTANA. QazAqparat - Zaıybymen janjaldan keıin Astanadaǵy kópqabatty úıdiń shatyryna shyqqan er adam kórshilerin ábirgerge saldy, dep habarlaıdy QazAqparat.
«Qaıǵyly jaǵdaıdyń aldyn alý úshin belsendi azamattyq pozıtsııa tanytqan adamdarǵa polıtsııa alǵysyn bildiredi. 15 qańtarda saǵat 17:00-der kezinde polıtsııaǵa kópqabatty úıdiń shatyrynan er adam sekirýge oqtalǵandyǵy týraly habar kelip tústi. Turǵyndar men kommýnaldyq qyzmet ókilderi ony mundaı qadamǵa barmaýǵa kóndirgen. Oqıǵa ornyna kelgen polıtseıler jaǵdaıdyń mán-jaıyn anyqtaý úshin er adamdy «Baıqońyr» aýdanyndaǵy polıtsııa basqarmasyna jetkizdi», - delingen Astana qalalyq Polıtsııa departamentiniń málimetinde.
Belgili bolǵandaı, er adam otbasylyq janjaldan keıin osyndaı tásilmen zaıybynyń nazaryn aýdarýǵa sheshim jasaǵan.
«Medıtsınalyq kýálandyrý barysynda atalǵan turǵyn ishimdikke masaıǵany anyqtaldy. 33 jastaǵy osy adamǵa qatysty ákimshilik hattama toltyryldy», - dep naqtylady departament.
Osyǵan deıin áleýmettik jelilerde Astanadaǵy turǵyn úıdiń shatyryna shyqqan er adamǵa qatysty vıdeo taralǵan.
