Astanada kópqabatty úıden sekirip, ómirimen qosh aıtysqan eki qyz balanyń sektada bolǵany anyqtaldy - ІІM
ASTANA. QazAqparat - Astanada kópqabatty úıden sekirip, ómirimen qosh aıtysqan eki qyz balanyń «gottar» dep atalatyn sektada bolǵany anyqtaldy.
Bul týraly búgin Astanadaǵy Ortalyq kommýnıkatsııalar qyzmetinde ótken brıfıngte Іshki ister mınıstrligi Tergeý departamentiniń erekshe ister jónindegi aǵa tergeýshisi Arman Maǵjan málim etti.
Brıfıng barysynda jýrnalıster tarapynan osydan biraz buryn Astanada kópqabatty úılerdiń birinen sekirip ketken eki kámelettik jasqa tolmaǵan qyzdarǵa qatysty qozǵalǵan qylmystyq istiń qorytyndylary suralǵan bolatyn.
«Tekserý nátıjesinde bul eki kámelettik jasqa tolmaǵan qyzdardyń «gottar» dep atalatyn sektaǵa eliktirilgendigi anyqtaldy. Olar Internet arqyly «ómir túkke turǵysyz» degenge saıatyn aqparattar alyp otyrǵan. Sonyń saldarynan olar ómirimen qosh aıtysyp tyndy», -dedi A.Maǵjan.
Onyń sózine qaraǵanda, qazirgi tańda álgindeı eliktiretin aqparatty taratýmen aınalysatyn tulǵalar izdestirilip jatyr.
«Bundaı qylmystar, ólimge ıtermeleý ǵalamtor arqyly bolyp jatqandyqtan, tehnıkalyq turǵyda ondaı tulǵalardy der kezinde anyqtap, jaýapqa tartý birshama qıyndaý bolyp otyr», deıdi Arman Maǵjan.
