Astanada kópqabatty úıden órt shyǵyp, 3 adam aýrýhanaǵa tústi
ASTANA. QazAqparat – Elordada kópqabatty úıde órt bolyp, 3 adam, onyń ishinde 1 bala aýrýhanaǵa tústi, dep habarlaıdy QazAqparat qalalyq Tótenshe jaǵdaılar departamentine silteme jasap.
Búgin saǵat 10:43-te órt sóndirý bólimsheleri B.Momyshuly dańǵyly, 14 mekenjaıyndaǵy páterdiń órtengeni týraly shaqyrýǵa shyqqan.
«Órt sóndirýshiler shaqyrý ornyna úsh mınýtta jetti. Onda 15 qabatty úıdiń 11-qabatyndaǵy 50 sharshy metrli páterdi alapat órt shalyp, qatty tútin paıda bolǵan. Órt sóndirýshiler birinshi kezekte adamdardy qutqarýǵa kiristi. Óıtkeni janyp jatqan páterde kómek suraǵan adamdar bolǵan. Osylaısha, 5 adam, onyń ishinde bir bala qutqarylyp, 10 adam evakýatsııalandy. Kómirtegi totyǵymen ýlanǵan úsh adam, onyń ishinde bir bala aýrýhanaǵa jetkizildi», - dep habarlady TJ departamentinen.
Tilsiz jaýdy sóndirýge Astana qalasy Tótenshe jaǵdaılar departamentiniń 26 adamy jáne 6 tehnıkasy jumyldyryldy, onyń ishinde Apattar medıtsınasy ortalyǵynyń dárigerleri de bolǵan.
«Úıdiń aýlasynda turǵan avtokólikter órt ornyna barýdy aıtarlyqtaı qıyndatqanyn atap ótkimiz keledi. Órt shyqqan sátte ár sekýnd mańyzdy, sondyqtar avtokólik ıelerinen kireberis joldardy bógemeýdi suraımyz», - deıdi qutqarýshylar.
Foto: TJD
