Astanada kópqabatty úılerdegi órt qaýipsizdigi: qandaı talaptar saqtalmaı júr
ASTANA. KAZINFORM – Astana qalasynyń Tótenshe jaǵdaılar departamenti Memlekettik órt baqylaý basqarmasy bastyǵynyń orynbasary Ǵabıt Babaev elordadaǵy kópqabatty turǵyn úılerde órt qaýipsizdigi qalaı qamtamasyz etiletinin túsindirdi.
192 buzýshylyq anyqtaldy
Ǵabıt Babaevtyń aıtýynsha, Astanada bıiktigi 28 metrden asatyn nemese 10 jáne odan kóp qabatty 1138 turǵyn úı bar.
Jyl basynan beri osy sanattaǵy úılerde 52 órt tirkelgen. Byltyr osy kezeńde 50 órt bolǵan. Bıyl kópqabatty turǵyn úılerdegi órt saldarynan 4 adam mert bolyp, 8 adam jaraqat aldy. Onyń beseýi – bala.
Órttiń aldyn alý jáne qaýipsizdikti kúsheıtý úshin Tótenshe jaǵdaılar departamenti kóppáterli turǵyn úılerde profılaktıkalyq jumystar júrgizip jatyr. Jyl basynan beri mundaı sharalar 141 turǵyn úı keshenin qamtyǵan.
– Negizgi nazar evakýatsııa joldarynyń jaǵdaıyna, órtke qarsy qorǵaý júıeleri men alǵashqy órt sóndirý quraldarynyń jaramdylyǵyna aýdarylady. Sondaı-aq órt sóndirý tehnıkasynyń ǵımaratqa kedergisiz jetýine jaǵdaı jasalýy kerek, – dedi Ǵabıt Babaev.
Júrgizilgen jumystar aıasynda 37 nysan tekserilgen. Tekserý qorytyndysy boıynsha 35 tulǵa QR Ákimshilik quqyq buzýshylyq týraly kodeksiniń 410-babynyń 1-bóligi boıynsha ákimshilik jaýapkershilikke tartyldy.
Sonymen qatar profılaktıkalyq aralaý nátıjesinde 43 nysanǵa qatysty zańnamada belgilengen tártippen tekserý júrgizilgen.
– Tekserý nátıjesinde órt qaýipsizdigi talaptaryna qatysty barlyǵy 192 buzýshylyq anyqtaldy. Búginde onyń 117-si, ıaǵnı shamamen 61%-y joıyldy. Qalǵan 75 buzýshylyq baqylaýda tur. Negizgi zańbuzýshylyqtar qatarynda evakýatsııa joldarynyń bógelýi, órtke qarsy qorǵaý júıeleriniń jaramsyzdyǵy nemese talapqa saı kútip ustalmaýy, alǵashqy órt sóndirý quraldarynyń bolmaýy ne jaramsyzdyǵy bar. Sondaı-aq ǵımaratqa kireberiste turǵan avtokólikter órt sóndirý tehnıkasynyń ótýine kedergi keltiredi, – dedi Ǵabıt Babaev.
Órt sóndirý tehnıkasynyń jolyn ne bógeıdi
Kóppáterli turǵyn úılerdiń aýlasyna órt sóndirý jáne qutqarý tehnıkasynyń erkin kirýine erekshe nazar aýdarylyp otyr.
Ǵabıt Babaevtyń aıtýynsha, jergilikti atqarýshy organdar men polıtsııa qyzmetkerleri prokýratýranyń úılestirýimen jedel qyzmetterdiń ótýine bóget bolatyn zańsyz tosqaýyldardy anyqtaý jáne joıý boıynsha reıdter júrgizip jatyr.
– Reıd barysynda zańsyz ornatylǵan beton bloktar, baǵandar, shynjyrlar men ózge de qorshaýlar anyqtalady. Sondaı-aq talapqa saı qoıylmaǵan, órt sóndirý tehnıkasynyń ótýine bóget bolatyn avtokólikterge nazar aýdarylady, – dedi ol.
Órt kezinde ár mınýt mańyzdy
Tótenshe jaǵdaılar departamenti turǵyndardy aýla aýmaǵyna óz betinshe qorshaý ornatpaýǵa jáne órt sóndirý tehnıkasynyń ǵımaratqa jaqyndaýyna bóget bolatyn jerlerge kólik qoımaýǵa shaqyrdy.
– Órt bolǵan jaǵdaıda ár mınýt mańyzdy. Avtokólik nemese qorshaý jaýyp turǵan birneshe metrdiń ózi órt sóndirý-qutqarý bólimsheleriniń jumysyn aıtarlyqtaı qıyndatýy múmkin, – dedi Ǵabıt Babaev.
Onyń aıtýynsha, kóppáterli turǵyn úılerdegi órt qaýipsizdigin kúsheıtý jumystary jalǵasady. Negizgi mindet – buzýshylyqtardy anyqtap qana qoımaı, olardyń joıylýyn qamtamasyz etý jáne adam ólimi men jaraqattanýyna ákelýi múmkin jaǵdaılardyń aldyn alý.
Aıta keteıik, buǵan deıin elorda aýlalaryndaǵy órt sóndirý tehnıkasynyń qozǵalysyna kedergi keltiretin zańsyz shlagbaýmdar men beton bógetter tekserilip jatqanyn jazǵan edik.
