Astanada kópqabatty turǵyn úılerdegi órt qaýipsizdigi sharalary kúsheıtildi
ASTANA. KAZINFORM — Astanada bıiktigi 28 metrden asatyn nemese 10 jáne odan da kóp qabatty 1138 kóppáterli turǵyn úı bar. Qalada mundaı úılerde órttiń aldyn alý jáne órt qaýipsizdigi deńgeıin arttyrý baǵytynda júıeli jumys júrgizilip jatyr, dep habarlaıdy elorda ákimdiginiń resmı saıty.
Bul týraly Kommýnıkatsııalar qyzmetinde ótken brıfıngte Astana qalasy Tótenshe jaǵdaılar departamenti Memlekettik órt baqylaý basqarmasy bastyǵynyń orynbasary Ǵabıt Babaev málimdedi
Órttiń aldyn alý jáne órt qaýipsizdigin kúsheıtý maqsatynda Astana qalasynyń Tótenshe jaǵdaılar departamenti júıeli profılaktıkalyq jumys júrgizip keledi. Jyl basynan beri aldyn alý is-sharalary barysynda 141 kóppáterli turǵyn úı kesheni qamtyldy.
Onyń aıtýynsha, jıi kezdesetin zań buzýshylyqtardyń qatarynda evakýatsııalaý joldarynyń jabyq bolýy, órtten qorǵaý júıeleriniń aqaýly nemese talapqa saı kútilmeýi, bastapqy órt sóndirý quraldarynyń bolmaýy ne jaramsyz kúıde bolýy, sondaı-aq órt sóndirý tehnıkasynyń ǵımaratqa kirýine kedergi keltiretin kólikterdiń kireberisterge qoıylýy bar.
Kóppáterli turǵyn úılerdiń aýlalaryna arnaıy tehnıkanyń kedergisiz kirýine de erekshe kóńil bólinedi. Jergilikti atqarýshy organdar men polıtsııa qyzmetkerleri prokýratýra organdarynyń úılestirýimen reıdter ótkizip, tótenshe jaǵdaılar qyzmetiniń jumysyna kedergi keltiretin zańsyz bógetterdi anyqtap, joıýda.
Reıdter barysynda zańsyz ornatylǵan beton bloktar, baǵanalar, shynjyrlar jáne basqa da qorshaýlar, sondaı-aq talapqa saı qoıylmaǵan ári órt sóndirý tehnıkasynyń ótýine kedergi keltiretin avtokólikter anyqtalady.
— Tótenshe jaǵdaılar departamenti turǵyndardy aýlalarǵa óz betinshe qorshaý ornatpaýǵa jáne órt sóndirý tehnıkasynyń kirip-shyǵýyna kedergi keltiretindeı etip kólik qoımaýǵa shaqyrady. Órt bolǵan jaǵdaıda ár mınýttyń mańyzy zor. Kólik nemese qorshaý bógep turǵan birneshe metrdiń ózi órt sóndirý-qutqarý bólimsheleriniń jumysyna aıtarlyqtaı kedergi keltirýi múmkin. Kóppáterli turǵyn úılerdegi órt qaýipsizdigi deńgeıin arttyrý jumysy jalǵasyp jatyr. Basty mindet — zań buzýshylyqtardy anyqtap qana qoımaı, olardyń naqty joıylýyn qamtamasyz etý jáne adamdardyń qaza bolýy men jaraqat alýyna ákelýi múmkin jaǵdaılarǵa jol bermeý, — dep qorytyndylady spıker.
Buǵan deıin Almatyda kabeldik shahtadaǵy órtke baılanysty jedel shtab qurylǵanyn jazǵan edik.
