Astanada kópqabatty turǵyn úıdiń jedelsatysynda buzaqylyq jasaǵan áıel ustaldy
Elordadaǵy turǵyn úı keshenderiniń birinde belgisiz adam lıftide buzaqylyq jasady. Búginde kináli adam tabylyp, jaýapqa tartyldy, dep habarlaıdy Kazinform Astana ákimdiginiń resmı saıtyna silteme jasap.
Oqıǵa Jırentaev kóshesindegi kópqabatty úıde bolǵan. Belgisiz adam lıftige kirip, ony tepkileı bastaǵan, sonymen qatar kabınany judyryqpen uryp, tyrnap, túkirgen.
Almaty aýdandyq Polıtsııa basqarmasynyń polıtseıleri qylmyskerdiń jeke basyn anyqtady. Ol 33 jastaǵy jergilikti turǵyn bolyp shyqty. Ony ýaqytsha ustaý bólmesine ornalastyrdy.
Osy iske qatysty usaq buzaqylyq jasaǵany jáne jalpy paıdalaný oryndaryn lastaǵany úshin QR ÁQBtK 434-babynyń 1-bóligi jáne QR ÁQBtK 434-2-babynyń 1-bóligi boıynsha ákimshilik is qozǵaldy.
Aıta keteıik, elordada vandalızmniń kez kelgen kórinisterimen belsendi kúres júrgizilip jatyr. 2023 jyldyń basynan beri Astana polıtsııasynyń qyzmetkerleri vandalızmniń 100-den astam faktisin anyqtady. Qala boıynsha kúndelikti patrýldi 2 myńnan astam polıtsııa qyzmetkeri júzege asyrady.
Esterińizge sala keteıik, elordada eriktiler, belsendiler, tanymal sportshylar, pikir kóshbasshylary, qala turǵyndary qoldaǵan «Toqta, vandal» aktsııasy jalǵasýda. Aktsııa aıasynda qalada kúndizgi jáne túngi reıdter ótkiziledi, halyq arasynda qoǵamdyq tártipti saqtaý qajettiligi týraly túsindirý jumystary júrgiziledi.
