Astanada kópqabatty turǵyn úıden órt shyǵyp, úsh bala qaza tapty

ASTANA. KAZINFORM – Búgin túnde Astana qalasynyń Esil aýdanyndaǵy Túrkistan kóshesinde ornalasqan 21 qabatty turǵyn úıdiń 15-qabatyndaǵy páterden órt shyqty. Qaza tapqandar bar. Bul týraly TJM habarlady. 

Habarlama túskennen keıin Tótenshe jaǵdaılar mınıstrliginiń kúshteri men quraldary oqıǵa ornyna jedel jetti. Alǵashqy bólimsheler kelgen sátte páterde ashyq jalyn bolǵany anyqtaldy.

Órtti sóndirý barysynda janyp jatqan páterden kúıik alǵan áıel qutqarylyp, jedel medıtsınalyq járdem brıgadasyna tapsyrylǵan. Zardap shekken turǵyn №1 kópsalaly qalalyq aýrýhanaǵa jatqyzyldy. 

– Oqıǵa ornynan úsh kámeletke tolmaǵan balanyń denesi tabyldy. TJM kúshteri joǵary qabattardan 20 adamdy evakýatsııalady. Sonymen qatar 40-qa jýyq turǵyn ǵımarattan óz betinshe shyǵyp úlgergen, – delingen mınıstrliktiń aqparatynda.

Órt tolyqtaı sóndirildi. Qazirgi ýaqytta órttiń shyǵý sebepteri anyqtalyp jatyr.

Ákimdik málimetinshe, zardap shekken áıelge jáne qaza tapqandardyń otbasyna qajetti jan-jaqty kómek kórsetiledi. Jaǵdaı baqylaýǵa alynǵan.

Eske sala keteıik, buǵan deıin Sátbaev qalasynda órtten er adam men tórt bala qutqaryldy.