Astanada kópbalaly jáne az qamtylǵan otbasylardyń balalaryna arnalǵan lager ashyldy

ASTANA. QazAqparat - Astana qalasynda Halyqaralyq balalardy qorǵaý kúni qarsańynda «Jas shýaq» jazǵy lageri ashyldy. Jazǵy demalystyń úsh aıynda bul lagerde jaǵdaıy tómen jáne kópbalaly otbasylardan 100 bala demalady.

100 balaǵa arnalǵan demalys «Zamandas 21» qoǵamdyq qory uıymdastyrǵan «Jas shýaq» jobasy aıasynda ótedi. Bul ıgi is «Aqnıet» jeke qorynyń demeýshilik kómeginiń arqasynda júzege asyrylyp jatyr.

Bul jazǵy lagerde 80 bala men jasóspirimderdiń qabilettilikterin tanytýyna múmkindik berilip, jalpy jáne psıhologııalyq saýlyqtaryn nyǵaıtý úshin shyǵarmashylyq, áleýmettik jáne sporttyq is-sharalardyń keshendi túrde ótkizilýi josparlanyp otyr.

Sonymen qatar, 10 kúndik Şýchınsk-Býrabaı demalys aımaǵynda ornalasqan «Kontınent» balalardy saýyqtyrý ortalyǵyna arnalǵan joldamalar 20 balaǵa saltanatty túrde berildi.

«Aqnıet» jeke qorynyń Qamqorshylyq keńesiniń tóraıymy Baǵıla Bısembaeva óziniń quttyqtaý sózinde: «Balalarǵa qamqorlyq - bul bárimizdiń úlken jaýapkershiligimiz, sondyqtan balalarǵa jan-jaqty jaǵdaı jasaýǵa árqaısymyz úlesimizdi qosýymyz qajet» - dep atap ótti.

Atalǵan joba balalarǵa salaýatty ómir súrý qaǵıdalaryn úırenýge, jańa bilimderdi ıgerýge jáne ár balanyń jeke tulǵa bolyp ósýine múmkinshilik beredi. Balalar lageriniń saltanatty ashylýynda ata-analar alǵys sózderin bildirdi.