Astanada kópbalaly analarǵa «Altyn alqa» jáne «Kúmis alqa» tósbelgileri tabystaldy
ASTANA. QazAqparat - Elordada «Almaty» aýdany ákimdiginde kópbalaly analarǵa «Altyn alqa» jáne «Kúmis alqa» tósbelgilerin saltanatty túrde tabys etý rásimi ótti, dep habarlady astana.gov.kz.
Alty balany dúnıege ákelgen A. Álimjanova, G. Birmaǵanbetova, ıÝ. Býhareva, L. Qoılybaeva, S. Muqajanova, A. Ospanqulova, A. Sadyrova, M. Toǵjanova jáne M. Shákirt «Kúmis alqa» nagradalarymen marapattaldy. «Altyn alqa» nagradasyna jeti jáne odan da kóp bala týyp, tárbıelegen Baqyt Aǵytaeva, Baıan Ahmetbekova, Nurzat Bolatqan jáne Ásel Jarymbetova ıe boldy. Qurmetti ataqty ardaqty analarǵa «Almaty» aýdanynyń ákimi Bekbol Saǵyn tabys etip, olarǵa elimizdiń demografııalyq damýyna eleýli úles qosqany úshin alǵysyn bildirip, zor densaýlyq pen otbasylarynyń amandyǵyn tiledi.
Eske salaıyq, «QR memlekettik nagradalary týraly» QR zańyna sáıkes «Kúmis alqa» medali alty balany dúnıege ákelip, altynshy bala bir jasqa tolǵan soń jáne basqa balalar tiri bolsa beriledi. Al jeti jáne odan kóp balasy bar analar sońǵy bala bir jasqa tolǵannan keıin «Altyn alqa» medalimen marapattalady. Aıta keteıik, «Altyn alqa» jáne «Kúmis alqa» Qazaqstan Respýblıkasynyń ordeni mártebesine ıe. 2010 jyldan beri alty jáne odan kóp bala tárbıelep-ósirgen analardy marapattaý saltanaty ótkizilip keledi.
