Astanada kóp qabatty turǵyn úıde gazdyń jarylýy saldarynan 4 adam jaraqattandy, birneshe páter zaqymdaldy
ASTANA. 23 jeltoqsan. QazAqparat - Beısenbi kúni Astanada Saryarqa dańǵyly, 19 meken-jaıynda ornalasqan bes qabatty turǵyn úıde gazdyń jarylýy saldarynan 4 adam jaraqattandy,
birneshe páter zaqymdaldy.
Búgin QR TJM-nan naqtylaǵandaı, tótenshe jaǵdaıdyń sebebi - jınalyp qalǵan gaz ben aýa qospasynyń jarylýy. Onyń arty órtke ulasyp, 3-inshi kireberistiń ekinshi qabatynda ornalasqan páter jandy. Onymen birge, soqqy tolqynymen bir qabatta ornalasqan eki páter jáne ekinshi kireberistiń ekinshi qabatynda ornalasqan taǵy eki páter zaqymdaldy.
3 sharshy metr aýmaqty sharpyǵan tilsiz jaýdyń oshaǵy 21 mınýttyń ishinde joıylyp, taǵy 11 mınýttan keıin ol tolyǵymen aýyzdyqtaldy. Jalynmen kúreske QR TJM Astana qalasy boıynsha TJD órtke qarsy qyzmetiniń 29 adamy men 7 tehnıkasy, QR TJM «Ortalyq óńirlik aeromobıldi shuǵyl qutqarý jasaǵy» MM-niń 6 adamy men 1 tehnıkasy, QR TJM «Apat medıtsınasy ortalyǵy» MM-niń 3 adamy men 1 tehnıkasy jumyldyryldy.
Qutqarýshylar 40 adamdy qaýipsiz aýmaqqa shyǵardy. Oqıǵa saldarynan 26 jastaǵy azamat, 34 jáne 77 jastaǵy eki áıel men 9 jasar bala zardap shekti. Olar túrli jaraqattarmen aýrýhanaǵa jetkizildi.
