Astanada kóp qabatty turǵyn úı men dúkende bolǵan órtten 16 adam qutqarylyp, 80 adam qaýipsiz jerge kóshirildi - TJM
ANA. 2 qarasha. QazAqparat - Keshe túnde Astanada kóp qabatty turǵyn úı men dúkende bolǵan órtten 16 adam qutqarylyp, 80 adam qaýipsiz jerge kóshirildi.
Bul týraly QR TJM-nan málim etti.
Tótenshe oqıǵa túngi saǵat 11 shamasynda Almaty aýdany Tolstoı kóshesinde ornalasqan on qabatty turǵyn úıde oryn aldy. Órt elektrkabelderi shahtasynyń boıymen turǵyn úıdiń 1 jáne 6 qabattaryna deıin kóterilip, úıdiń alǵashqy qabatynda ornalasqan «Lıberýs» dúkeniniń ishki aspaly shatyryn jalmady.
Jalyndy aýyzdyqtaýǵa TJD órtke qarsy qyzmetteriniń 30 adamy men 8 tehnıkasy, sondaı-aq Apatty medıtsına ortalyǵynyń 6 adamy men 2 tehnıkasy jumyldyryldy. Órt bir jarym saǵattan keıin sóndirildi.
Qutqarýshylardyń aıtýynsha, oqıǵa saldarynan 27 jastaǵy bir azamat kómirqyshqyl gazyna ýlanyp, aýrýhanaǵa jetkizilgen.
