Astanada kóp balaly analarǵa «Altyn» jáne «Kúmis» alqalardy tapsyrý saltanaty ótti
STANA. Naýryzdyń 20-sy. QazAqparat /Gúlmıra Álıakparova/ - Búgin Astanadaǵy R.Raıymbek atyndaǵy №50 orta mektepte kóp balaly analarǵa «Altyn alqa» jáne «Kúmis alqa» medaldaryn tapsyrý rásimi ótti,
dep habarlaıdy QazAqparat.
Qazaqstan Respýblıkasy Prezıdentiniń Jarlyǵymen búgin «Altyn» jáne «Kúmis» alqalardy elordanyń Almaty aýdanynda turatyn barlyǵy 144 ana aldy. Buǵan deıin qurmetti medaldardy atalmysh aýdannyń 148 azamatshasy taqqan bolatyn.
«Altyn» alqamen marapattalǵandardyń aldyn bastap otyrǵan 84 jastaǵy Bıken Ómirzaqova 8 bala tárbıelep, ósirgenin aıtady. Aýyldyń qurmetti eńbekkeri atanǵan aqjaýlyqty anamyz búginde 22 nemere 6 shóbere súıip otyr.
Al «Altyn» alqanyń eń jas ıegeri 45 jastaǵy Quralaı Muhamedjanova 7 balanyń anasy. Osydan úsh jyl buryn Astanaǵa kóship kelgen otbasyndaǵy úıdiń úlkeni nebári 26-da. «Kópbalaly analarǵa kórsetip otyrǵan qamqorlyǵy úshin Elbasyna sheksiz alǵysymdy bildiremin. Táýelsiz Qazaqstannyń aspany ashyq bolyp, yntymaq-birlik bolsa, eldiń demografııalyq jaǵdaıy da arta túsetinine senimin mol», - deıdi ol.
Aıta keteıik, Memleket basshysy N.Nazarbaevtyń tapsyrmasyna oraı 2010 jyldan bastap «Altyn alqa» nagradasy - 7 balany, al «Kúmis alqa» 6 balany tárbıelegen analarǵa beriletin bolyp uıǵaryldy. 1999 jylǵy sáýirdiń 5-indegi «QR-daǵy memlekettik arnaıy járdemaqy týraly» QR Zańyna sáıkes, járdemaqylar «Altyn alqa», «Kúmis alqa» medaldarymen marapattalǵan, ne bolmasa buǵan deıin «Batyr-ana» jáne 1-shi, 2-shi dárejeli «Ana dańqy» ordenderimen marapattalǵan analarǵa beriledi.
Osyndaı nagradalarǵa laıyqty analarǵa aı saıyn tólenetin járdemaqynyń mólsheri - 8 myń 478 teńgeni (6 aılyq-eseptik kórsetkish) quraıdy.
2010 jylǵy naýryzdyń 1-ine deıin Astana qalasynyń Zeınetaqylardy tóleý memlekettik ortalyǵyna kóp balaly analar retinde barlyǵy 1258 áıel tirkeldi.
