Astanada Konstıtýtsııa kúnine arnalǵan sporttyq sharalar ótedi
ASTANA. QazAqparat - Konstıtýtsııa kúnin merekeleý aıasynda elorda turǵyndary men qonaqtary úshin 50-den astam túrli shara uıymdastyrylady, sonyń ishinde, sporttyq jarystar, flesh-mobtar men aktsııalar, baıqaýlar, kórmeler, kontsertter bar, dep habarlady astana.kz
Naqtyraq aıtqanda, 27 tamyz kúni belsendi jastar Ortalyq parkte flesh-mob uıymdastyrady. Al keshke «Alaý» muz saraıynda balalar arasynda jarys bolady. 27-29 tamyzda «Avtomobılıst» fýtbol alańynda 10-11 jastaǵy uldardyń komandalary ózara sheberlik baıqasady. 27-31 tamyzda «Dáýlet» sport kesheninde eresekter arasynda taekvondodan «Halyqaralyq Gran-prı serııasy» týrnıri ótedi. Esil aýdanynyń turǵyndary 27-29 tamyzda kún saıyn saǵat 17.00 «Kóńildi start» sharasyna qatysady.
