Astanada konkýr boıynsha Eýrazııalyq lıga aıasyndaǵy álem kýbogynyń kezeńi ótedi

ASTANA. KAZINFORM - 30 mamyr men 1 maýsym aralyǵynda Astanadaǵy «Arǵymaq» atty at sporttyq saýyqtyrý kesheninde at sporty boıynsha halyqaralyq jarystar ótedi.

Federatsııanyń baspasóz qyzmeti málimetinshe, Qazaqstan astanasy konkýr boıynsha Eýrazııalyq lıganyń álem kýbogy kezeńin jáne atpen mánerlep júrý boıynsha halyqaralyq týrnırdi qabyldaıdy.

At sportynyń halyqaralyq federatsııasy (FEI) aıasynda ótetin bul jarystarǵa jaqyn jáne alys shet elderdiń ulttyq quramalary qatysady.

Astanada shamamen 60 sportshy óner kórsetedi dep josparlanyp otyr. Olar úsh kún boıy konkýr jáne túrli deńgeıdegi atpen mánerlep júrý saıystarynda óz sheberlikterin kórsetedi.

Álem kýbogynyń kezeńin Astanada ótkizý otandyq sportshylarǵa halyqaralyq arenada ózderin tanytýǵa múmkindik beredi. Mundaı deńgeıdegi jarystar qazaqstandyq atletterdiń sheberligin shyńdap, halyqaralyq týrnırlerge irikteý joldamalaryna talasýǵa jaǵdaı jasaıdy.

Aıta keteıik, astanalyq sportshylar konkýrdan halyqaralyq jarysta 33 medal jeńip aldy.