Astanada kóńil kóterý oryndarynda 50-ge jýyq quqyq buzýshylyq anyqtaldy
ASTANA. QazAqparat - Astana qalasynyń polıtseıleri aǵymdaǵy jyldyń 29-31 naýryzynda qala aýmaǵynyń kóńil kóterý oryndarynda quqyq buzýshylyqtyń aldyn-alý, eskertý sondaı-aq jolyn kesýge baǵyttalǵan is-sharalardy ótkizdi, dep habarlaıdy eloranyń ІІD baspasóz qyzmeti.
«Jedel aldyn-alý is-sharasyn ótkizý barysynda kúzet fırmalarynyń qyzmet zańdylyǵy, sondaı-aq tıisti lıtsenzııalarynyń, beınebaqylaý kameralary men sıgnalızatsııalarynyń bar-joǵy tekserildi. Sonymen qatar, ıývenaldyq polıtsııa qyzmetkerleri oıyn-saýyq ortalyqtarynda kámelet jasqa tolmaǵan balalardy anyqtaý jumystaryn júrgizdi», - delingen habarlamada.
Budan bólek habarlamada jedel aldyn-alý is-sharasynyń qorytyndysy boıynsha aýmaqtaǵy abattandyrý erejelerin buzý, jeke qoǵamdyq oryndarda temeki shegý syndy tártip buzýshylyqtar men QR kóshi-qon zańnamasyn buzǵandardy anyqtaý boıynsha jalpy 48 ákimshilik quqyq buzýshylyq anyqtalǵany aıtylǵan.
Mekeme dırektorlary Qazaqstan Respýblıkasynyń Іshki ister mınıstrliginiń kúzet uıymdaryna qatysty «Kúzet qyzmeti týraly zańdary» boıynsha normatıvtik qujattarymen tanystyrý jumystaryn júrgizdi.
