Astanada kóne dástúr — Qymyzmuryndyq toılandy

Qymyzmuryndyq — qazaq halqynyń kóne salt-dástúrleriniń biri.

Kóktem shyǵyp, bıe baılanyp, alǵashqy qymyz ashytylǵan kezde aýyl turǵyndary bas qosyp, aqtan dám tatqan.

Osy bir ata-dástúrdi jańǵyrtý — sharanyń basty maqsaty.

— Búgin aǵa býyn ókilderiniń basyn qosyp, rýhanı serpilis syıladyq. Belsendi uzaq ómir súrý ortalyǵy árdaıym ardagerlerimizdiń belsendi, mándi de, salaýatty ómir súrýine jaǵdaı jasap, ulttyq mádenıetimizdi nasıhattaýǵa erekshe kóńil bóledi, — dedi Belsendi uzaq ómir súrý ortalyǵynyń dırektory Serik Qarabatyrov.

Merekede qala turǵyndary Belsendi uzaq ómir súrý ortalyǵynyń ájeleri ázirlegen qolóner kórmesin tamashalady.

Sonymen qatar asyq atý, láńgi tebý, jilik syndyrý sekildi ulttyq oıyndar uıymdastyryldy.

Qymyz saýý rásimi kórsetilip, teatrlandyrylǵan qoıylym arqyly qazaqtyń baıyrǵy dástúrleri de dáripteldi.

— Biz osy dástúrdi jańǵyrtý arqyly jastar men búgingi shara qonaqtarynyń merekeniń máni men mańyzyn tereń túsinip, ony ózgelerge nasıhattaýyn qalaımyz. Ulttyq salt-dástúrlerimizdi keler urpaqqa amanat etip, sabaqtastyǵyn saqtaý — basty mindetimiz, — dedi Saryarqa aýdandyq áleýmettik qyzmet kórsetý bóliminiń basshysy Kenjebolat Bapıshev.

Jıynda eldi mekenderden kelgen kásipkerler turǵyndarǵa balǵyn qymyz usyndy.

Solardyń biri — Nurjamal Baqytova. Ol 18 jyldan astam ýaqyt boıy bıe baılap, qymyz ashytyp, saýda oryndaryna jetkizýmen aınalysyp keledi.

— Búgingi Qymyzmuryndyq merekesi qutty bolsyn! Qymyz ishý mádenıetin damytý maqsatynda qazirgi tańda eki júzden astam bıe baılap, qymyz óndiremiz. Osy ýaqyt ishinde eki márte EXPO kórmesine qatystyq: alǵashqasy — Astana qalasynda, ekinshisi — Dýbaı qalasynda ótti. Bul kórmelerde qazaqtyń qymyzy men ulttyq mádenıeti álemge tanystyryldy. Qazir Qymyzmuryndyq merekesi aıasynda halyqqa júz lıtrden astam qymyz usynýdy josparlap otyrmyz, — dedi ol.

Aıta keteıik, jyldyń alǵashqy eki aıynyń qorytyndysy boıynsha qymyz óndirisi 11,8% ósken.