Astanada kondıtsıonerleri bar avtobýstar kóbeıedi
ASTANA. QazAqparat - Búgingi kúni Astanadaǵy qoǵamdyq kólikterdiń úshten bir bóligi ǵana aýany salqyndatatyn qurylǵylarmen jabdyqtalǵan, dep habarlaıdy QazAqparat elorda ákimdiginiń medıa-ortalyǵyna silteme jasap.
«Astana LRT» jolaýshylar kóligi bóliminiń jetekshisi Beıbit Esjanovtyń aıtýynsha, sońǵy kezderi kondıtsıonerlerdiń joqtyǵynan jolaýshylar tarapynan aryz-shaǵymdar jıi túsedi.
«Búgingi kúni Astanadaǵy jolaýshylar kóliginiń 35% ǵana salqyndatqysh qurylǵylarmen jabdyqtalǵan. Alaıda jyl aıaǵyna deıin bul kórsetkish ulǵaıady: 250 eskirgen avtobýs aýystyrylady. Biz olardy Evro 6 sanaty boıynsha barlyq álemdik standarttarǵa saı keletin jańa avtobýstarmen almastyramyz. Sáıkesinshe, olar salqyndatqysh júıelermen jabdyqtalatyn bolady», - dedi B.Esjanov.
Sondaı-aq, ol aýa temperatýrasy +15 gradýsty kórsetkende jolaýshylar júrgizýshiden salqyndatqyshty qosýdy talap ete alatynyn eske saldy.
Jolaýshylar kez kelgen másele boıynsha «Astana LRT» kompanııasynyń 8 (7172) 574-777 nómirlerine habarlasa alady.
