Astanada qonaqúıdiń káriz júıesinen shala týǵan náresteniń denesi tabyldy
ASTANA. KAZINFORM – Osy derek boıynsha 29 jastaǵy áıel ustaldy.
Polıtsııa qonaqúıdiń káriz júıesinen shala týǵan náresteniń denesi tabylǵanyn aıtty.
— Osy derek boıynsha 29 jastaǵy áıel ustaldy. Qazir sotqa deıingi tergep-tekserý júrgizilip jatyr, — delingen jaýapta.
Polıtsııanyń málimetinshe, osy oqıǵaǵa baılanysty qonaqúı ıesine Qazaqstan Respýblıkasynyń zańnamasyna sáıkes qylmystyq jáne ózge de quqyq buzýdyń jasalýyna yqpal etken sebepter men jaǵdaılardy joıý týraly usynym engizilgen.
Sondaı-aq qonaqúı ornalasqan aýmaq ýchaskelik polıtsııa ınspektorlarynyń turaqty baqylaýyna alynǵan.
— Quqyq buzýshylyqtardyń aldyn alý jáne jolyn kesý maqsatynda profılaktıkalyq is-sharalar men tekserýler júıeli túrde júrgiziledi. Sonymen qatar qonaqúı ákimshiligimen jáne onda turyp jatqan azamattarmen túsindirý jumystary turaqty júrgizilip keledi. Zańnamada kózdelgen barlyq qajetti shara qabyldanyp jatyr, — delingen departamenttiń resmı jaýabynda.
Aıta ketelik bıyl jyl basynan beri osy qonaqúıge qatysty «102» arnasyna 19 habarlama túsken. Bul týraly Astana qalasy Polıtsııa departamenti Kazinform agenttiginiń resmı saýalyna bergen jaýabynda málim etti.
Polıtsııanyń málimetinshe, túsken habarlamalardyń barlyǵy tekserilgen.
— Bıylǵy jyldyń basynan beri atalǵan qonaqúıge qatysty «102» arnasyna 19 habarlama tirkeldi. Tynyshtyqty buzǵany úshin 13 adam ákimshilik jaýapkershilikke tartyldy. Qoǵamdyq tártipti buzǵany úshin taǵy 3 adamǵa ákimshilik shara qoldanyldy, — delingen departamenttiń resmı jaýabynda.
Aıta ketelik Aqtóbede sábıin qoqysqa tastap ketken anaǵa qatysty qylmystyq is qozǵalǵan edi.
