Astanada qonaqúı qurylysy úshin 26 jer ýchaskesi májbúrlep alynady
ASTANA. KAZINFORM – Astana ákimdigi qonaqúı qurylysyna baılanysty jer ýchaskelerin memlekettik qajettilik úshin májbúrlep ıelikten shyǵarý týraly qaýly qabyldady.
Qujatqa sáıkes, 2026 jylǵy 3 tamyzdan 2027 jylǵy 3 tamyzǵa deıin Astana qalasynyń Esil aýdanyndaǵy D. Qonaev pen Saraıshyq kósheleriniń arasynda ornalasqan, jalpy aýmaǵy 7,6618 gektardy quraıtyn 26 jer ýchaskesi memlekettik qajettilik úshin, onyń ishinde satyp alý jolymen májbúrlep ıelikten shyǵarylady.
Qaýlyda jer ýchaskeleriniń menshik ıeleri men jer paıdalanýshylar aldaǵy májbúrlep ıelikten shyǵarý týraly habarlamany alǵan kúnnen bastap 15 kúntizbelik kún ishinde Astana qalasynyń ákimdigine tıisti ótinish berý arqyly kelisý rásimderin bastaýǵa quqyly ekeni jazylǵan.
Budan bólek, elorda ákimdigi memlekettik qajettilik úshin 10 jer ýchaskesin májbúrlep ıelikten shyǵarý týraly taǵy bir qaýly qabyldady.
Atap aıtqanda, Zarechnyı turǵyn alabyndaǵy Úshqopyr men Qaratóbe kósheleriniń qıylysy mańynda ornalasqan, jalpy aýmaǵy 2,3 gektardan asatyn jer ýchaskeleri satyp alynbaq. Bul aýmaqta mektep qurylysyna qajetti ınjenerlik izdestirý jáne jobalaý jumystary júrgiziledi.
Aıta keteıik, 2026 jyldyń birinshi toqsanynda Astana qonaqúılerinde 67,9 myń sheteldik týrıst ornalasty. Qalada 6 bes juldyzdy qonaqúı bar.
