Astanada qonaq úıden qundyz ton urlaǵan adam ustaldy
ASTANA. QazAqparat - Elordalyq polıtseıler qonaqúıden qundyz ton urlaǵan kúdiktini ustady, dep habarlaıdy QazAqparat tilshisi qalalyq Polıtsııa departamentiniń baspasóz qyzmetine silteme jasap.
Departamentten habarlanǵandaı, er adam kıim iletin bólmede bolyp, qonaqúıde ótip jatqan sporttyq bı chempıonatyna qatysýshylar men kelýshilerdiń qundyz tony men uıaly telefonyn jymqyrǵan.
Jedel-izdestirý is-sharasy barysynda polıtsııa qyzmetkerleri kúdiktini Pavlodar qalasynda ustady. Ol 36 jastaǵy, buryn urlyq jasaǵany úshin sottalǵan qala turǵyny bolyp shyqty. Ustalǵan kúdikti ýaqytsha oqshaýlaǵyshqa qamaldy. Jymqyrylǵan ton alynyp, ıesine qaıtaryldy», - dep habarlanady departamenttiń baspasóz qyzmetinen.
Atalǵan fakt boıynsha QR QK-niń 188-babymen (urlyq) sotqa deıingi tergep-tekserý júrgizilýde. Ustalǵan adamnyń elorda aýmaǵynda buryn jasalǵan osyǵan uqsas qylmystarǵa qatystylyǵy tekserilýde.
