Astanada konkımen júgirýden Qazaqstan chempıonaty aıaqtaldy
ASTANA. QazAqparat - Elordadaǵy «Alaý» muzaıdyny saraıynda kópsaıystan Qazaqstan chempıonaty aıaqtaldy, dep habarlaıdy elorda ákimdiginiń baspasóz qyzmetinen.
Konkımen júgirý sportynda sprınterlik jáne klassıkalyq kópsaıys, shaǵyn kópsaıys, kishi jáne áıelder kópsaıystary boldy. Qashyqtyqtar kombınatsııasy 500, 1000, 1500 jáne 5000 metrdi qurady. Qazaqstandyq sportshylar kópsaıystan el birinshiligin maýsymnyń sońynda ótkizedi. Elimizdegi úzdik staıer Dmıtrıı Babenko maýsymdy merziminen buryn aıaqtady. Jarys qorytyndysy áıelder arasynda 3000 metr, erler arasynda 5000 metr qashyqtyqqa júgirýde anyqtaldy. Tórt qashyqtyqtyń jalpy nátıjesi boıynsha áıelder arasynda petropavldyq Elena Ýrvantseva kópsaıys jeńimpazy atandy. Hromtaýlyq Marııa Sızova 2-shi oryndy ıelendi. 3-shi oryndy qaraǵandylyq Alena Stapsova oljalady. Erler arasynda almatylyq Maksım Baklashkın chempıonat jeńimpazy atansa, 2-shi oryndy elordalyq sportshy Dmıtrıı Morozov aldy. 3-shi oryn qaraǵandylyq Stanıslav Palkınge buıyrdy. Búgin «Alaý» muzaıdyny saraıynda 2014-2015 jj. maýsymdaǵy resmı jarystar baǵdarlamasyn jabatyn tórtinshi kásibı «Alau Ice Marathon» ótedi.
