Astanada konkı tebýden Qazaqstan chempıonaty bastaldy
ASTANA. QazAqparat - «Alaý» muz aıdyny saraıynda jekeleı qashyqtyqtarda konkı tebý sportynan Qazaqstan chempıonaty bastaldy. Jarys tórt kún boıy ótedi, dep habarlaıdy astana.kz.
Elimizdiń segiz óńirinen kelgen 150 sportshy jaqsy daıyndyqta bolý úshin bapkerlerimen birge úsh apta boıy Astana qalasynda jattyǵýlaryn ótkizdi. Chempıonat qorytyndysy boıynsha halyqaralyq jarystar men jasóspirimder týrnırlerinde Qazaqstan namysyn qorǵaıtyn quramalar jasaqtalady. Búgin jarystyń saltanatty ashylýy rásiminen keıin sportshylar alǵashqy qashyqtyqtaryn baǵyndyrdy. Erteń muz aıdynǵa jarystyń kil myqtylary shyqpaq, olardyń qatarynda ulttyq qurama músheleri - 2013 jylǵy álem chempıony Denıs Kýzın men álem Kýbogy kezeńiniń qola júldegeri Ekaterına Aıdova bar. Atalmysh chempıonattyń basty ereksheligi resmı baǵdarlamaǵa jańa tártipterdiń engizilýi bolyp tabylady. Qazaqstandyq konkı sportynyń tarıhynda alǵash ret komandalyq sprınt ótkiziledi. Bul Halyqaralyq konkı sporty federatsııasy uıymdastyrǵan qyzyqty da tartymdy baǵdarlama túri. Reseılik maman Sergeı Klevchenıa basqarǵan QR jastar quramasynyń el birinshiligine alǵash ret qatysyp otyrǵandaryn da atap ótken jón. «Alaý» muz aıdyny saraıy barlyq elorda turǵyndaryn qazannyń 24-inde saǵat 11:00-de ótetin chempıonattyń qorytyndy kúninde sportshylardy qoldaýǵa shaqyrady. Jarys aıaqtalǵan soń buqaralyq syrǵanaýlar ótkiziledi.
