Astanada konkı sportynan sprınt boıynsha Qazaqstan chempıonaty ótýde
ASTANA. QazAqparat - Búgin Astanada konkı sportynan Qazaqstan chempıonaty jalaýyn kóterdi. Jarysqa elimizdiń Qostanaı, Soltústik Qazaqstan, Almaty, Qaraǵandy, Aqtóbe oblystarynan jáne Astana men Almaty qalalarynan myqty degen atletter synǵa túsýde.
Birinshi jarys kúninde 500 metrlik qashyqtyq boıynsha sprınterlik jarystar ótti. Erler arasynda osy saıystyń elimizdiń byltyrǵy chempıony Roman Krech (35.39) birinshi oryndy ıelendi. Kúmis medaldi Fedor Mezentsev (36.04) ıelense, úshinshi orynǵa Denıs Kýzın (36.05) turaqtady.
Áıelder arasynda 39.37 ýaqytyn kórsetken Qaraǵandy oblysynyń ókili Ekaterına Aıdova birinshi keldi. Marııa Sızova (40.74) men Evgenııa Safına (41.43) tıisinshe ekinshi jáne úshinshi oryndarda.
«Bıylǵy eń mańyzdy jarystardy Qazaqstan Respýblıkasynyń sprınterlik kópsaıys boıynsha chempıonatymen bastap jatyrmyz. Bul birinshilik óte mańyzdy, sebebi ol Astanada ótetin sprıntten álem chempıonaty qarsańynda daıyndyq bolyp tabylady. Búgin biz 500 metrlik qashyqtyqtaǵy jarystardy ótkizdik, eshqandaı tosyn nátıjeler tirkelgen joq. Áıelderden Ekaterına Aıdova jeńdi. Ol sonshalyqty jaqsy nátıje kórsetken joq, óıtkeni bir jyl boıy eshbir týrnırlerge qatysqan joq. Erlerge keletin bolsaq, munda da barlyǵy kútilgendeı elimizdiń úzdik sprınteri Roman Krech jeńip ketti. Romanda úlken úzilis boldy sportta, ol jaraqattanyp, kúzde ota jasatty. Olımpıadadan keıin bul onyń birinshi starty. Bir qýantarlyǵy onyń kórsetken 35.39 ýaqyty ájeptáýir joǵary nátıje», - dedi QR konkı sportynan bas bapkeri Vadım Saıýtın.
Erteń, jarystyń ekinshi kúninde 1000 metrlik saıystar ótedi. Eń qyzyǵy áli alda, sebebi fınalda jeńimpazdy eki 500 metrlik jáne eki 1000 metrlik jarystardyń jalpy ýaqyt somasyn qosý arqyly anyqtaıdy. Kýzın men Mezentsev búgin jasyndaı jarqyldaǵan Krechti erteń 1000 metrlik saıystarda artqa tastaýy yqtımal.
